Міністр Карпенка паведаміў, якой будзе рэформа адукацыі
Міністр адукацыі Ігар Карпенка паведаміў, як плануе мяняць сістэму адукацыі. Свае прапановы ён агучыў на рэспубліканскім педсавеце, які праходзіць 24 жніўня ў Мінску.
Игар Карпенка — справа. Фота: Дар'я Буракіна, TUT.BY
TUT.BY выбраў самыя цікавыя прапановы.
Ігар Карпенка лічыць неабходным пераход на абавязковую агульную сярэднюю адукацыю. Па словах міністра, ёсць «дзяржаўны запыт на адукаванага высокакваліфікаванага спецыяліста, ёсць патрэба і гатоўнасць да такога пераходу». Зараз амаль 100% вучняў у краіне ўжо атрымліваюць агульную сярэднюю адукацыю. Пераход, на думку Ігара Карпенкі, пазітыўна паўплывае на развіццё чалавечага патэнцыялу і міжнародны імідж краіны.
Якасць адукацыі, на думку міністра, не павінна вымярацца вынікамі ЦТ або «запаветным месцам у гімназіі, адукацыя павінна ацэньвацца па ўзроўні асобаснага і сацыяльнага развіцця кожнага вучня».
Змяніць правілы паступлення ў гімназіі. «Неабходна зрабіць больш жорсткімі патрабаванні да якасці адукацыі ў гімназіях з улікам профілізацыі, — сказаў міністр. — Профілізацыю варта звязваць не з уступнымі іспытамі ў 5-ы клас гімназіі, а з свядомым выбарам прафесіі, магчыма, у больш старэйшым узросце. Сёння на практыцы навучанне ў гімназіі — гэта не выбар вучня, а амбіцыі бацькоў. Напрыклад, сітуацыя гэтага года: здаўшы ўсе экзамены на 9 балаў, вучань не паступае ў гімназію. Такі стрэс нічым не апраўданы. Агульнаадукацыйная школа мае такое ж права, як і гімназія, і ліцэй, на далейшае навучанне адораных матываваных навучэнцаў. Сумесна з педагогамі-практыкамі неабходна выпрацаваць крытэрыі такога адбору: гэта будзе адпавядаць і прынцыпам сацыяльнай справядлівасці і роўнадаступнай агульнай сярэдняй адукацыі, якія гарантаваныя нашым заканадаўствам, а не намеціўшайся нейкай элітарнасцю нашай адукацыі».
На ўзроўні ПТВ пакінуць адзін від установы адукацыі — каледж.
На ўзроўні вышэйшай адукацыі будзе бакалаўрыят, які выпускае спецыялістаў, і магістратура. У медыцыне, ядзернай энергетыцы навучанне застанецца ранейшым — бесперапынныя 5-6 гадоў.
Правілы прыёму ў ВНУ будуць удасканальвацца. «Вопыт паказаў пэўную неадпаведнасць паміж сярэднім балам атэстата і вынікамі ЦТ. Нам трэба глыбока і дэталёва прааналізаваць перавагі і недахопы сістэмы», — сказаў Карпенка. Паводле яго слоў, на некаторыя спецыяльнасці пры паступленні ў ВНУ будуць праводзіцца гутаркі, на некаторыя — уведзеныя дадатковыя ўнутраныя экзамены.
У якасці выпускнога экзамену за 11 класаў прапануецца праводзіць комплексны агульнаадукацыйны тэст.
Усе школы павінны быць аснашчаны высокахуткасным інтэрнэтам.
У кантракты міністр прапануе ўнесці новы пункт: педагог абавязаны будзе інфармаваць наймальніка аб тым, што ажыццяўляе дзейнасць рэпетытара.