Бацькоўскі сход дзеля збору подпісаў за вылучэнне дырэктара школы?

Пра чарговы факт выкарыстання адміністратыўнага рэсурсу ў Мінску паведамляе Андрэй Бажко на сваёй старонцы ў сацыяльных сетках.

Пры зборы подпісаў за вылучэнне кадыдатам у дэпутаты Наталлі Сляпян, якая мае намер вылучацца па Куйбышаўскай выбарчай акрузе №46 г. Мінска, мела месца выкарыстанне адміністратыўнага рэсурсу. Дарэчы, Наталля Сляпян з’яўляецца дырэктарам Мінскай сярэдняй школы №53 і дзеючым дэпутатам Мінскага гарадскога савета дэпутатаў.

 Бацькі вучняў некалькі дзён таму праз Viber атрымалі паведамленне аб тым, што ў панядзелак, 18 снежня, у школе адбудзецца бацькоўскі сход: “Яўка для ўсіх абавязковая! Просьба ўзяць з сабой пашпарт”, — інфармавала настаўніца.

“Было так, — піша ў сацыяльных сетках Андрэй Бажко, ­— да пачатку да сходу класны кіраўнік сабраў пашпарты ў бацькоў, не патлумачыў навошта, і адправіў іх у актавую залу. Пасля сходу, тых, хто падыходзіў да настаўнікаў забраць пашпарт, прасілі застацца і распісацца. Пры гэтым зноў людзям нічога не патлумачылі. Падпісаліся, нават не ведаючы за што. А ці з'яўляюцца настаўнікі, якія такім чынам збіралі подпісы за дырэктара школы, сябрамі ягонай ініцыятыўнай групы?” — задаецца пытаннем прадпрымальнік.

Андрэй Бажко паведаміў пра гэты факт выбарчай камісіі. Але ў адказ пачуў: “Ну і што? У яе пікет кожны дзень, прэтэнзій няма!»

Што думаюць на гэты конт прадстаўнікі кампаніі “Праваабаронцы за свабодныя выбары”?

Валянцін Стэфановіч найперш адзначае, што, згодна з п. 10 арт. 61 Выбарчага кодэкса Рэспублікі Беларусь, удзел адміністрацыі арганізацыі ў зборы подпісаў не дапускаецца. Парушэнне гэтых патрабаванняў, згодна з арт. 65 Выбарчага кодэкса, можа стаць падставай для адмовы ў рэгістрацыі ў якасці кандыдата ў дэпутаты ці адмене рашэння аб рэгістрацыі ў якасці кандыдата.

 “Улічваючы той факт, што ў якасці кандыдата ў дэпутаты Мінгарсавета вылучаецца дырэктар школы Наталля Сляпян, настаўнікі якой і збіралі подпісы ў бацькоў падчас бацькоўскага сходу ў гэтай школе, можна казаць аб парушэнні прынцыпаў роўнасці правоў і абавязкаў кандыдатаў у дэпутаты на этапе іх вылучэння, — лічыць праваабаронца. — Згодна з арт. 73 Выбарчага кодэкса, кандыдаты ў дэпутаты не маюць права выкарыстоўваць перавагі свайго службовага становішча ў інтарэсах абрання. Пад выкарыстаннем перавагаў службовага становішча ў дадзеным Кодэксе разумеецца сярод іншага прыцягненне асобаў, якія знаходзяцца ў падпарадкаванні ці іншай службовай залежнасці, для ажыццяўлення ў працоўны час дзейнасці, якая спрыяе вылучэнню ці (альбо) абранню. Пры парушэнні патрабаванняў дадзенага артыкула адпаведная акруговая, тэрытарыяльная камісія мае права адмовіць у рэгістрацыі кандыдата ці адмяніць рашэнне аб яго рэгістрацыі”.

 “Праваабаронцы за свабодныя выбары”