Аўтуховіч падаў ад слабасці і прасіў выклікаць хуткую. Суддзя: «Вам проста трэба паесці»

Мікалай Аўтуховіч настолькі знясілеў, што прасіў медыцынскай дапамогі проста на пасяджэнні. За гэта яго выдалілі з клеткі і спынілі працэс.

Пра знясіленасць Аўтуховіча, які 16-ы дзень працягвае галадоўку, напісала яго дачка.

«Сёння турэмны доктар зноў заявіў, што стан бацькі дазваляе яму ўдзельнічаць у судовых пасяджэннях. Адвакат у чарговы раз заявіла хадайніцтва на агляд бацькі вонкавымі лекарамі, якое, натуральна, было адхіленае. Аналіз крыві, які бралі ў мінулы чацвер, 21 ліпеня, нібыта яшчэ не гатовы.

Тата (пакуль яго вялі на суд) упаў ад слабасці і стукнуўся аб кайданкі», — напісала дачка Аўтуховіча.

Па інфармацыі «Н*шай Нівы», на пасяджэнні 26 ліпеня Мікалай прасіў урача. Ён хацеў, каб выклікалі хуткую дапамогу, але суддзя Максім Філатаў адмовіў, сказаўшы, што Аўтуховічу «проста трэба паесці».

Пасля Мікалая Аўтуховіча выдалілі з пасяджэння і амаль адразу перанеслі працяг працэсу.

Заўтра ў судзе будзе перапынак, ён працягнецца ў чацвер.

«Групу Аўтуховіча», у якой 12 чалавек, судзяць па «тэрарыстычных» артыкулах Крымінальнага кодэкса. За кратамі яны знаходзяцца з канца 2020 года.

Аўтуховіч 11 ліпеня абвясціў «сухую галадоўку». Ён патрабуе, каб яму пачалі перадаваць лісты ад сваякоў і іншых людзей. Нядаўна абарвалася ліставанне нават са старой маці.

Аўтуховіч — беларускі рэкардсмен у турэмным галадаванні. У 2009 годзе ён галадаваў 90 дзён, у 2005-2006 — 74 дні. Пры гэтым ён піў ваду. У 2013 годзе ён на знак пратэсту парэзаў сабе жывот у турме.

Мікалаю Аўтуховічу 59 гадоў, ён ветэран вайны ў Афганістане, ваўкавыскі прадпрымальнік і грамадскі актывіст. Гэта трэцяе яго зняволенне. За кратамі ён больш як паўтара года. Усяго па «справе Аўтуховіча» судзяць 12 чалавек.

Блізкія просяць дасылаць Мікалаю негазаваную ваду, сокі, мёд у пластыкавых пакунках, каб ён у любы момант мог пачаць выхад з галадоўкі.

Падтрымаць Мікалая Аўтуховіча, дасылаць яму лісты і бандэролькі можна на адрас: Турма №1, 230023, Гродна, Кірава, 1, Аўтуховічу Мікалаю Мікалаевічу.