Раманчук: «Гэты часовы стан блазноты хутка скончыцца. Пачнецца новая хваля інфляцыі»

Адказы на галоўныя пытанні: якімі будуць цэны, ці можна захоўваць грошы ў банку і ці купляць зараз валюту. Эканаміст — пра ўяўнае ўмацаванне рубля і пра тое, чаму не варта верыць дзяржаве.

— Моц расійскага рубля (маем на ўвазе і беларускага) — гэта карысць для невялікай групы людзей. Але гэта праклён для экспарцёраў, якія нічога не могуць купіць, таму што гэта штучны паказчык, — каментуе «Салідарнасці» апошнія тэндэнцыі на валютным рынку Яраслаў Раманчук. — Гэта карысць для тых людзей, якія могуць карыстацца гэтымі рэсурсамі ў рэжыме манаполіі. Зноў жа — такі іх вельмі мала.

Гэта палітычна матываваны курс, які адвязаны ад рэальнасці, як савецкі рубель. Тады былі людзі ў кіраўніцтве Крамля, цяпер такія ж ёсць у атачэнні Лукашэнкі, і яны ўпаўнаважаныя займацца знешнегандлёвымі аперацыямі. Натуральна, для іх гэта добра, яны атрымліваюць рублі з Дзяржбанка і канвертуюць па нізкім курсе ў валюту.

А потым яны прывязуць тавар, заробяць на ім, выручку прададуць па курсе свабоднага рынку і заробяць яшчэ раз. У гэтых людзей двайны ўздым.

Мы апынуліся ў сітуацыі макраэканамічнай разбалансаванасці 90-х гадоў, якія не дарэмна называюць «ліхімі». Тады не было макраэканомікі, стабільных цэн, рынкавага рубля. Усё нагадвала стан кіпячага катла, і гэта стан вяртаецца сёння.

Эксперт тлумачыць, чаму ў людзей ствараецца ілюзія стабільнасці, якой так любяць бравіраваць расійскія і беларускія ўлады.

— Людзі сталі менш зарабляць, але з-за падаючых курсаў валют ствараецца ілюзія, што ўсё нармальна, у доларавым эквіваленце зарплата ж расце.

Але гэты часовы стан блазноты хутка скончыцца. Пачнецца новая хваля інфляцыі, якая з цяперашніх 20% павялічыцца да 40%. Усё можа здавацца класным, калі звяртаць увагу толькі на курс валют і не звяртаць увагу на інфляцыю.

Але калі падлічыць, то апынецца, што на росце інфляцыі вы губляеце ў некалькі разоў больш, чым тое, што выйграяце на курсах. Гэта значыць, у кішэні ўсё роўна залезлі і вымусілі плаціць усіх гэты інфляцыйны падатак.

Для ўладаў такі штучна высокі курс рубля — гэта ілюзія стабільнасці, ён адцягвае ўвагу. У нас жа такая «курсавая свядомасць», усё мераецца за кошт курсу. Аднак праз інфляцыю ў вас усё роўна забіраюць 20%, а ў Расіі па базавым таварам ужо і ўсе 40%.

Трэба глядзець на два параметры. Не толькі на тое, што за кошт розніцы курсаў заробак у доларах крыху павялічыўся. Адначасова палічыце, колькі вы марнуеце у месяц на базавыя тавары і паслугі. І вы ўбачыце, што і ў доларах сталі марнаваць значна больш, што сталі жыць горш, бядней, вось самая галоўная выснова, — заключае спецыяліст.

Ён тлумачыць, чаму настойвае на тым, каб людзі ўсё-ткі перакладалі рублі ў валюту.

— Раз ужо такі выгадны курс ёсць, і ў Беларусі валюта ў наяўнасці, яе трэба купляць. Я думаю, у другой палове года многае зменіцца. Зменшацца старыя запасы, трэба будзе закупляць хоць бы крытычны імпарт. Справа ў тым, што тыя, хто купляе валюту на ўнутраным рынку па цяперашніх нізкіх курсах, усё роўна потым тавар будуць прадаваць, арыентуючыся, дапусцім, не на 2,2, а на 3,4 ці нават больш.

Таму што ім трэба зарабіць, а які будзе курс у наступным цыкле, ніхто не разумее, у выніку, закладваць будуць па максімуме. Усё гэта адаб'ецца на цэнах, яны вырастуць яшчэ больш. А на валютным рынку будзе працягваць павялічвацца розніца паміж рэальным і афіцыйным курсамі.

Таму, паўтаруся, трэба не пазяхаць, а закупляць валюту і ствараць сабе падушку бяспекі. Захавайце мінімум беларускіх рублёў на бягучыя выдаткі, астатняе пераводзьце ў валюту. Асабліва, калі ў вас ёсць на дэпазітах нейкія рублёвыя ўклады, і вы думаеце, як выдатна зарабіць 10%.

Майце на ўвазе, што сёння пры інфляцыі 20% стаўка па дэпазітах на рублёвыя ўклады павінна быць мінімум 25%. Што тычыцца валютных укладаў, то калі вы думаеце, што паспееце іх зняць па добрым курсе, яшчэ і зарабіўшы працэнты, то я вас засмучу: не паспееце, вам проста ніхто не дасць магчымасці здымаць па такім курсе, — перасцерагае Раманчук.

У той жа час ён звяртае ўвагу на яшчэ большую суму, якую беларусы працягваюць захоўваць у нашых банках.

— Цікава, што ў банках на дэпазітах у беларусаў ляжаць 8 мільярдаў рублёў. Людзі думаюць, што гэтыя мільярды зарабляюць на зніжэнні курсу валют. Яны думаюць, калі яшчэ крыху пачакаць, то можна павялічыць свае назапашванні яшчэ больш. Вось гэтыя людзі, безумоўна, страцяць шмат. Дзяржава прапанавала ім нібыта выгадную стаўку, разлічваючы, што яны панясуць грошы ў банк. Выратаваць іх можа толькі, калі яны згуляюць на апярэджанне і не будуць чакаць, пакуль дзяржава падмане ў чарговы раз, — упэўнены эканаміст.

Гаворачы аб будучых пераменах, Раманчук адзначае фактар, які можа стаць вырашальным для падзення расійскага рубля.

— Гэта цяпер непісьменныя расійцы працягваюць верыць Пуціну, таму што ў іх усё добра і што яны з усім справяцца. Яны не выкарыстоўваюць і нават многія не ведаюць пра магчымасць набыць валюту ў той жа Беларусі. Замбаваныя мазгі з'яўляюцца дастаткова добрым бар'ерам.

Але страта даверу да Пуціна і яго палітыкі будзе праходзіць адначасова са стратай даверу да рубля. Гледзячы на сённяшнія падзеі, можна казаць пра тое, што ўсё можа памяняцца радыкальна і вельмі хутка, — папярэджвае Раманчук.