Ці ёсць падставы для росту заробкаў?

Экс-кіраўнік Нацбанка Беларусі Станіслаў Багданкевіч патлумачыў, чаму ў Беларусі вырас сярэдні заробак.

Згодна са звесткамі Белстата, у Беларусі другі месяц запар расце сярэдні заробак, у чэрвені ён склаў 953,7 рублі. У маі беларусы зараблялі 944 рублі.

Станіслаў Багданкевіч пракаментаваў гэта “Радыё Рацыя”:

— Мяркую, што нейкае ажыўленне ў эканоміцы і насамрэч ёсць, хаця тут, як кажуць, не варта адразу пляскаць у ладкі. Усё-такі пераважна заробкі ў краіне нізкія, нават калі параўноўваць з тымі ж прыбалтамі альбо палякамі. Але я разумею жаданне ўладаў падвышаць заробкі.

— Зараз не адбываецца штучнага падвышэння заробкаў?

— Адміністрацыйны рэсурс у гэтым накірунку працуе па бюджэтнай лініі, а ў эканоміцы трэба чакаць натуральны рост заробкаў. Людзі ж не зацікаўлены працаваць за малыя грошы. Уласнікі вымушаны лічыцца з гэтым, каб захаваць кадры.

— Але ў рэгіёнах заробкі па-ранейшаму нізкія…

— Трэба разумець, што сярэдні заробак — гэта абсалютна не паказчык рэальнага ўзроўню дабрабыту людзей. Калі сталіца можа пахваліцца прыстойнымі заробкамі, то ў рэгіёнах справа значна горшая. Таму, калі Белстат вылічвае, сярэднюю тэмпературу па бальніцы, гэта абсалютна не азначае, што наша эканоміка здаровая.

Кастусь Заблоцкі, Беларускае Радыё Рацыя