Бізнэс-саюзы выказаліся супраць адмены пластыкавага посуду ў грамадскім харчаванні

Прадстаўнікі бізнэсу лічаць, што замена пластыкавага посуду на экалагічную ўпакоўку пацягне за сабой павелічэнне яе кошту ў 2-4 разы, адпаведна, вырасце і кошт на прадукцыю, што пастаўляецца.

У Беларусі з 1 студзеня 2021 года будзе дзейнічаць забарона на выкарыстанне і продаж некаторага аднаразовага пластыкавага посуду ў арганізацыях грамадскага харчавання.
Поўную забарону на выкарыстанне «пластыка» ў беларускім грамадскім харчаванні плануецца ўвесці з 2023 года, каб ва ўсёй галіны і бізнэсу быў час падрыхтавацца.
У сувязі з гэтым сем бізнэс-саюзаў сярод якіх Рэспубліканскі саюз прамыслоўцаў і прадпрымальнікаў, Беларуская навукова-прамысловая асацыяцыя, Бізнэс-саюз прадпрымальнікаў і наймальнікаў ім. М.С. Куняўскага, Рэспубліканская канфедэрацыя прадпрымальніцтва, Беларускі саюз прадпрымальнікаў і Беларускае таварыства ацэншчыкаў накіравалі ў МАРТ калектыўны ліст з крытыкай праекту.
У лісце гаворыцца, што ўказаны праект наўрад ці выконвае патрабаванне кіраўніка дзяржавы аб прыняцці неадкладных мер па адмове ад пластыкавай упакоўкі, а хутчэй толькі імітуе дзейнасць па рэалізацыі пастаўленай задачы.
На погляд аўтараў ліста, гэта звязана, перш за ўсё, з тым, што дадзеная пастанова тычыцца толькі адной галіны — грамадскага харчавання, дзе ў стацыянарных аб’ектах прымяняецца, у асноўным, шматразовы посуд; у аб’ектах хуткага харчавання (тыпу КFC, Макдональдс і інш.) з-за іх індывідуальных праграм развіцця і, кіруючыся прынцыпамі сацыяльнай адказнасці бізнесу, максімальна выкарыстоўваецца экалагічная ўпакоўка.
«Дадзеная пастанова галоўным чынам будзе тычыцца выязнога гандлю, кафэтэрыяў, кулінарыі, дзе асноўнымі спажыўцамі з’яўляюцца людзі з невысокім узроўнем даходаў (студэнты, работнікі сацыяльнай сферы, пенсіянеры). Пры гэтым замена пластыкавага посуду на экалагічна бяспечную ўпакоўку пацягне за сабой павелічэнне яе кошту ў 2-4 разы, а, адпаведна, цана на прадукцыю, што пастаўляецца ўзрасце», — адзначаюць прадстаўнікі бізнес-саюзаў.
Прадстаўнікі бізнэсу лічаць, што аб’екты грамадскага харчавання патрапяць у няроўныя ўмовы з вытворцамі гатовай прадукцыі: апошнія змогуць вырабляць і рэалізоўваць сваю прадукцыю ва ўпакоўцы з пластыка.
Па словах аўтараў ліста, напрыклад, квас, піва ў пластыкавых бутэльках можа вырабляцца і рэалізоўвацца праз гандлёвую сетку, а піва і квас на разліў у бары або пры выязным гандлі аб’ектамі грамадскага харчавання будуць павінны разлівацца ў шкляны або папяровы посуд.
У бізнэс-саюзах упэўненыя, прапанаваная забарона практычна не знізіць негатыўнае ўздзеянне на навакольнае асяроддзе.
У сувязі з гэтым там прапаноўваюць адмовіцца ад прыняцця пастановы, але на сістэмным узроўні пад эгідай Мінпрыроды і Міністэрства аховы здароўя прапрацаваць меры па зніжэнні ўздзеяння на здароўе чалавека і прыроду некаторых пластмасавых вырабаў.
Нагадаем, яшчэ ў мінулым годзе кіраўнік Беларусі даў даручэнне па памяншэнні выкарыстання ў краіне пластыка. Тады ж ён даручыў узяць на жорсткі кантроль і пытанні адходаў.
Паводле health.ej.by