У Польшчу перастала паступаць расійская нафта

Яшчэ ў 2015 годзе расійская нафта складала амаль 100% сыравіны, якая перапрацоўваецца на заводах польскай кампаніі Orlen. Але цяпер расійскай нафты ў Польшчы амаль не засталося.

Польскі нафтаперапрацоўчы канцэрн PKN Orlen паведаміў, што больш не атрымлівае пастаўкі нафты з Расіі, піша «Польскае радыё». Пастаўкі па трубаправодзе «Дружба» ў Польшчу былі спыненыя расійскім бокам, падкрэслілі ў кампаніі.

У той жа час, як паведамілі ў кампаніі, PKN Orlen цалкам гатовы да такой сітуацыі, і пастаўкі на нафтаперапрацоўчыя заводы могуць быць ажыццёўлены выключна марскім шляхам. Таму бягучае прыпыненне не паўплывае на забеспячэнне польскіх кліентаў прадукцыяй кампаніі, уключаючы бензін і дызельнае паліва.

Як нагадалі ў кампаніі, з пачатку лютага 2023 года, пасля заканчэння тэрміну дзеяння кантракту з «Раснафтай», пастаўкі расійскай нафты пакрывалі толькі блізу 10% патрэбаў Orlen у нафце. Гэта былі выключна трубаправодныя пастаўкі, у дачыненні да якіх не былі ўведзеныя міжнародныя санкцыі. PKN Orlen падкрэсліў, што ён ужо адмовіўся ад імпарту нафты па моры і гатовага паліва з Расіі з пачатку вайны ва Украіне, значна раней, чым было ўведзена эмбарга Еўрасаюза на такія пастаўкі.

ЕС дамовіўся аб увядзенні столі коштаў на расійскую нафту ў $60. Але можа і панізіць

У цяперашні час імпартны партфель PKN Orlen заснаваны на пастаўках нафты з Паўночнага мора, Заходняй Афрыкі, Міжземнаморскага басейна, а таксама Персідскага і Мексіканскага заліваў. Важным партнёрам кампаніі з'яўляецца Saudi Aramco, з якой PKN Orlen заключыў стратэгічны кантракт на пастаўку нафты ў 2022 годзе, падкрэслілі ў кампаніі.

У той жа час кампанія нагадала, што яшчэ ў 2015 годзе расійская нафта складала амаль 100% сыравіны, якая перапрацоўваецца на заводах Orlen. Значнае скарачэнне выкарыстання гэтай сыравіны на польскіх НПЗ з'яўляецца вынікам інтэнсіўных намаганняў па дыверсіфікацыі паставак, адзначылі ў кампаніі.

Адзначым, у PKN Orlen ёсць кантракт на пастаўку нафты з расійскай кампаніяй «Татнафта», які дзейнічае да канца 2024 года. Польскі нафтаперапрацоўчы канцэрн заявіў, што прыпыніць імпарт, калі ЕС увядзе адпаведныя санкцыі, у адваротным выпадку разрыў дзейнага кантракту павышае рызыку неабходнасці выплаты кампенсацыі.