Прэзідэнт Польшчы: Варшава выставіць рахунак Берліну за вайну

Прэзідэнт Польшчы Анджэй Дуда напярэдадні 80-годдзя пачатку Другой сусветнай вайны заявіў, што Варшава неўзабаве «выставіць рахунак» Берліну за наступствы нападу на польскую тэрыторыю.

Паводле яго слоў, рэпарацыйныя выплаты з боку Германіі з'яўляюцца «пытаннем адказнасці і маралі». «Вайна, пра якую мы гаворым сёння, нанесла велізарную шкоду Польшчы», — адзначыў Дуда.
Прэзідэнт расказаў, што ў 2017 годзе ў краіне была створана парламенцкая камісія па рэпарацыях. Яна, як заявіў кіраўнік дзяржавы, мае намер прэзентаваць свой канчатковы даклад у бліжэйшы час.
Дуда нагадаў пра разбуральныя наступствы вайны для Польшчы. У прыватнасці, ён звярнуў увагу на тое, што амаль 6 млн палякаў загінулі, многія гарады сур'ёзна пацярпелі, а польская сталіца была цалкам разбурана. Пры гэтым польскі лідар адзначыў, што цяпер у Польшчы і Германіі добрыя адносіны, якія ёсць «узорам для пераймання многіх народаў свету». «Мы ніколі не забывалі гісторыю, але Германія і Польшча памірыліся», — сказаў на заканчэнне ён.
Der Spiegel адзначае, што на мінулым тыдні польскі прэм'ер Матэвуш Маравецкі ўжо рабіў падобную заяву. Ён, у прыватнасці, заявіў, што Германія падчас вайны знішчыла па меншай меры 1000 польскіх вёсак. У сваю чаргу, міністр замежных спраў Польшчы Яцэк Чапутовіч паскардзіўся на «недахоп фундаментальнай справядлівасці» ў пытанні рэпарацый краінам, якія пацярпелі ад дзеянняў Германіі. «Польшча была дыскрымінаваная ў гэтым пытанні», — казаў ён.
У 2017 годзе камісія па рэпарацыях ацаніла нанесеную Германіяй шкоду ў $ 48,8 млрд. Аднак менш чым праз год у Сойме прыйшлі да высновы, што суму рэпарацый трэба павялічыць у некалькі разоў. У сакавіку 2018 года гэтая сума павялічылася да $ 850 млрд.
Нямецкія ўлады, прызнаючы сваю адказнасць за разбурэнні, адмаўляюць неабходнасць новых выплат. Яны спасылаюцца на рэзалюцыю польскага Сойма ад 1953 года. У гэтым дакуменце Варшава прызнавала, што ФРГ выканала ўсе свае абавязацельствы па выплаце адшкадавання. У 1991 годзе Берлін і Варшава падпісалі новае пагадненне аб добрасуседстве, якое было паклікана канчаткова ўрэгуляваць пытанні кампенсацый. Тады Германія выплаціла Польшчы € 1,3 млрд.
nn.by