Прэзідэнт Паўднёвай Карэі абвясціў ваеннае становішча: Што адбываецца?
Пра ўвядзенне ваеннага становішча прэзідэнт Паўднёвай Карэі Юн Сак Ёль абвясціў падчас тэлезвароту. Ён назваў гэтую меру неабходнай для абароны ліберальнага канстытуцыйнага парадку ад «камуністычных сіл». Апошнім разам ваеннае становішча ў Паўднёвай Карэі ўводзілася ў 1979 годзе. І кіруючая партыя, і апазіцыя не пагадзіліся з увядзеннем ваеннага становішча, піша ВВС.
У апошні раз ваеннае становішча ў Паўднёвай Карэі ўводзілася ў 1979 годзе пасля забойства тагачаснага дыктатара Пак Чон Хі.
Паводле слоў Юн Сак Ёля, пагроза зыходзіць як ад Паўночнай Карэі, так і ад мясцовых «антыдзяржаўных элементаў», якіх неабходна выкараніць.
На сайце тэлеканала YTN апублікаваны тэкст звароту прэзідэнта да нацыі, у якім ён абвінавачвае апазіцыю ў тым, што яна паралізуе працу дзяржавы, спрабуюе зладзіць імпічмент ключавым урадавым асобам і чыноўнікам.
Паводле яго слоў, з моманту пачатку працы новага ўрада (выбары прайшлі вясной гэтага года) Нацыянальны сход прыгразіў імпічментам 22 дзяржаўным служачым, у тым ліку некалькім пракурорам, міністру ўнутраных спраў і міністру абароны.
Пры гэтым Юн Сак Ёль не згадаў спробу імпічменту прэзідэнта.
«Гэта відавочны антыдзяржаўны акт, які топча канстытуцыйны парадак свабоднай Рэспублікі Карэя і разбурае легітымныя дзяржаўныя інстытуты, устаноўленыя Канстытуцыяй і законамі, спрабуюе справакаваць грамадзянскую вайну», — заявіў Юн Сак Ёль. Паводле яго, гэта беспрэцэдэнтна і для любой краіны ў свеце, і для Паўднёвай Карэі.
Юн Сак Ёль таксама абвінаваціў апазіцыю ва ўразанні бюджэту на найважнейшыя выдаткі: ад барацьбы з наркагандлем да дзіцячых дапамог.
«Наш Нацыянальны сход стаў логавам злачынных груп і спрабуе паралізаваць судова-адміністрацыйную сістэму краіны і зрынуць сістэму ліберальнай дэмакратыі праз заканадаўчую дыктатуру», — гаворыцца ў заяве.
І кіруючая партыя, і апазіцыя не пагадзіліся з увядзеннем ваеннага становішча.
Лідар паўднёвакарэйскай Дэмакратычнай партыі, якая мае большасць у парламенце, Лі Джэ Мен заявіў, што ваеннае становішча супярэчыць Канстытуцыі, а кіраўнік прэзідэнцкай партыі «Сіла народа» Хан Дон Хун назваў яго «няправільным» і паабяцаў заблакаваць.
Паўднёвакарэйскае агенцтва Yonhap паведамляе, што ўваход і выхад з Нацыянальнага сходу заблакаваныя паліцэйскімі аўтобусамі, а Мінабароны Паўднёвай Карэі склікае сустрэчу «ключавых камандзіраў».
Таксама паведамляецца, што міністр фінансаў Паўднёвай Карэі склікаў экстраннае пасяджэнне, на якім таксама будуць прысутнічаць кіраўнікі Банка Карэі, камісіі фінансавых паслуг і Службы фінансавага нагляду, піша Yonhap.
Прычыны палітычнага крызісу
На парламенцкіх выбарах, якія прайшлі ў Паўднёвай Карэі вясной гэтага года, 192 з 300 месцаў у Нацыянальнай асамблеі атрымала Дэмакратычная партыя.
У выніку сакрушальнай паразы, якую партыя прэзідэнта «Сіла народа» атрымала на выбарах, у адстаўку сышлі лідар гэтай партыі Хан Дон Хун і прэм'ер-міністр краіны Хан Док Су.
СМІ пісалі, што галасаванне на выбарах вясной можна было разглядаць як прамежкавы рэферэндум па пытанні наконт даверу прэзідэнту Юн Сак Ёлю, якому застаецца яшчэ тры гады знаходжання ва ўладзе.
Карэспандэнт ВВС у Сеуле Джэйк Квон нагадвае, што пасля прайграных яго партыяй парламенцкіх выбараў прэзідэнт не змог прыняць патрэбныя яму законы, замест гэтага яму давялося адчайна накладваць вета на любыя законы, якія прымаюцца апазіцыяй.
На гэтым тыдні Дэмакратычная партыя скараціла прапанаваны ўрадам і партыяй прэзідэнта бюджэт, аднак на яго Юн Сак Ёль накласці вета не можа.