МЗС Украіны пракаментаваў затрыманне беларускага журналіста Дзяніса Івашына

Прафесійная дзейнасць не павінна быць падставай для затрымання журналіста. Пра гэта заявілі ва ўкраінскім МЗС, выказаўшы заклапочанасць затрыманнем беларускага журналіста Дзяніса Івашына.

— Грамадзянін Беларусі са статусам замежнага ўкраінца (статус могуць атрымаць замежнікі, якія маюць ўкраінскае этнічнае паходжанне або паходжанне з Украіны. — Заўв. TUT.BY), журналіст і валанцёр Дзяніс Івашын дапамагаў распавядаць свету пра злачынствы падчас расійскай агрэсіі супраць нашай дзяржавы. Таму яго затрыманне выклікала занепакоенасць МЗС Украіны, — заявілі ва ўкраінскім знешнепалітычным ведамстве.
Там адзначаюць, што прафесійная дзейнасць не павінна быць падставай для пераследу.
— Гэта затрыманне выклікае асаблівую занепакоенасць на фоне наступу на свабоду слова, жыцця і здароўя журналістаў у Рэспубліцы Беларусь. Мы патрабуем, каб разгляд справы Дзяніса Івашына быў празрыстым і бесстароннім і працягваем уважліва сачыць за кожным наступным крокам беларускіх уладаў, — заявілі ў МЗС Украіны.
Дзяніса Івашына затрымалі ў Гродне на мінулым тыдні. У кватэры журналіста, на дачы, а таксама па месцы жыхарства яго родных прайшлі ператрусы.
Сёння стала вядома, што Івашыну прад'явілі абвінавачанне па арт. 365 («Умяшанне ў дзейнасць супрацоўніка органаў унутраных спраў») КК РБ. Бліжэйшыя два месяцы Івашын правядзе пад вартай.
tut.by