Мінабароны Польшчы абвясціла пра планы ўзвядзення сцяны на мяжы з Беларуссю

Улады Польшчы маюць намер узвесці на мяжы з Беларуссю сцяну, праінфармаваў у панядзелак польскі міністр абароны Марыюш Блашчак.

«На мяжы з Беларуссю будзе ўсталяваная новая, больш салідная загарода вышынёй у два з паловай метры», — напісаў міністр у Твітары.
Паводле яго слоў, «у дапамогу памежнікам будзе накіравана больш салдат».
«Пра дэталі ўдзелу ўзброеных сіл (у ахове мяжы) будзе паведамлена неўзабаве», — адзначыў ён.
На мінулым тыдні абароннае ведамства Польшчы паведаміла, што спецслужбы краіны прыступілі да ўмацавання польска-беларускай мяжы калючым дротам для таго, каб абараніцца ад наплыву бежанцаў з Ірака, Сірыі і Афганістана, якія спрабуюць патрапіць у ЕС праз Беларусь.
Паводле даных міністэрства, калючы дрот ўсталяваны амаль на 100 з 418 кіламетраў мяжы, і хутка такія загароды будуць гатовыя яшчэ на ўчастку ў 50 км.
«Прыярытэтам урада з'яўляецца бяспека польскіх грамадзян», — гаварылася ў заяве, распаўсюджанай тады міністэрствам абароны.
Прэм'ер-міністр Польшчы Матэуш Маравецкі, са свайго боку, абвінаваціў афіцыйны Мінск у шантажы, паколькі беларускія памежнікі не пускаюць мігрантаў назад у Беларусь, а Польшча, Латвія і Літва, куды спрабуюць трапіць людзі, не пускаюць іх да сябе. Праз гэта на мяжы часта ўспыхваюць канфлікты і сутыкненні.
«Шантаж Лукашэнкі не прымусіць нас прыняць каго-небудзь», — сказаў Маравецкі журналістам у сераду.
interfax.by