Каталонія мае намер аб'явіць незалежнасць «у бліжэйшыя дні»

Лідэр Каталоніі Карлэс Пучдэмон заявіў, што незалежнасць гэтага рэгіёну ад Іспаніі будзе абвешчана ў аднабаковым парадку на працягу бліжэйшых дзён.

У сваім першым інтэрв'ю пасля нядзельнага рэферэндуму ён заявіў, што ўрад Каталоніі распачне адпаведныя крокі «да канца гэтай — пачатку наступнага тыдня».
На пытанне аб тым, што каталонскія ўлады збіраюцца рабіць у выпадку, калі Мадрыд возьме кіраванне правінцыяй пад свой прамы кантроль (што дазваляецца канстытуцыяй Іспаніі) або арыштуе яго самога, Пучдэмон адказаў, што гэта было б «памылкай, якая зменіць усё».
Ён таксама дадаў, што на дадзены момант паміж Мадрыдам і яго адміністрацыяй няма ніякіх кантактаў, і выказаў сваю нязгоду з заявай Еўрапейскай камісіі, якая назвала падзеі ў Каталоніі ўнутранай справай Іспаніі.
Раней, кароль Іспаніі Філіп VI назваў безадказнымі і небяспечнымі паводзіны ўладаў Каталоніі, дзе 1 кастрычніка прайшоў не прызнаны ні Мадрыдам, ні Еўрасаюзам рэферэндум аб незалежнасці, які суправаджаўся сутыкненнямі яго ўдзельнікаў з сіламі правапарадку.
Па словах караля, безадказныя паводзіны каталонскіх уладаў могуць паставіць пад пагрозу эканамічную стабільнасць Іспаніі.
У тэлезвароце да народа Філіп VI заявіў, што якая склалася ў Іспаніі сітуацыя надзвычай сур'ёзная, і заклікаў да адзінства.

Акрамя таго, ён настойвае на тым, што рэферэндум быў супрацьзаконным, а яго правядзенне сведчыць аб непрымальным недахопе лаяльнасці з боку кіраўнікоў рэгіёну.

Усеагульны страйк

У аўторак прафсаюзы аб'явілі аб правядзенні ў Каталоніі ўсеагульнай забастоўкі. Пратэстоўцы блакавалі асноўныя дарогі ў Каталоніі, што прывяло да транспартных затораў на многіх напрамках.
Найбуйнейшы аптовы харчовы цэнтар Барселоны «Меркабарна» апусцеў ў аўторак: каля 770 кампаній, што працуюць на ім, спынілі працу.
Прафсаюзы паведамілі, што спыніў працу таксама марскі порт Барселоны. Практычна не працуе гарадское метро.
Аэрапорт Барселоны пакуль функцыянуе ў звычайным рэжыме. Таксама працуе і Барселонскае таксі.Як гаворыцца ў заяве прафсаюзаў, рашэнне пра страйк было прынята ў сувязі з парушэньнем правоў і знявагай свабод падчас правядзення рэферэндуму ў мінулую нядзелю.

Галасаванне і беспарадкі

Галасаванне яшчэ да яго пачатку прызнаў незаконным канстытуцыйны суд Іспаніі, але тым не менш у ім прынялі ўдзел — па дадзеных рэгіянальных уладаў — каля 2,2 млн чалавек.
Па паведамленнях карэспандэнтаў, пасля таго як паліцыя блакавала ўчасткі для галасавання, актывісты раздавалі бюлетэні на вуліцах усім жадаючым.
Падчас правядзення галасавання адбыліся сутыкненні паміж паліцыяй і актывістамі. У ходзе беспарадкаў пацярпелі сотні чалавек.
Некаторыя з вартавых парадку, якім было загадана не дапусціць правядзення галасавання, адкрылі стральбу гумовымі кулямі. Па дадзеных уладаў Каталоніі, падчас сутыкненняў раненні атрымалі 33 паліцэйскіх.
Зараз палітычныя лідэры спрабуюць знайсці выхад з сітуацыі, якая склалася. Кіраўнік урада Каталоніі заявіў аб неабходнасці новай дамовы з Мадрыдам аб статусе рэгіёну, аднак урад Іспаніі на чале з Марыяна Рахоем заявіў пра магчымае пазбаўленні Каталоніі статусу аўтаноміі.
Прадстаўнікі каталонскіх уладаў заяўляюць, што за незалежнасць рэгіёна выступілі амаль 90% жыхароў, якія прагаласавалі ў нядзелю. Аднак яўка апынулася ніжэй, чым чакалася — усяго 42%, што аслабляе пазіцыі Пучдэмона на магчымых перамовах з Мадрыдам аб статусе Каталоніі.
Паводле BBC