Дэпутат Дзярждумы Расіі ўнёс законапраект аб адмене прызнання незалежнасці Літвы

У Расійскую Дзярждуму ўнесены законапраект аб адмене прызнання незалежнасці Літвы.

Дэпутат ад «Адзінай Расіі» Яўген Фёдараў прапануе скасаваць пастанову Дзяржсавета СССР «Аб прызнанні незалежнасці Літоўскай Рэспублікі» ад 6 верасня 1991 года, паведамляе REFORM.by.

У абгрунтаванне свайго законапраекта Фёдараў спасылаецца на змены ў Канстытуцыі Расіі, якія абвяшчаюць, што РФ з’яўляецца правапераемніцай Саюза ССР на сваёй тэрыторыі, а таксама на вынікі рэферэндуму 17 сакавіка 1991 года. Ён таксама лічыць, што пастанова Дзяржсавета СССР была незаконнай, бо парушала Канстытуцыю СССР і закон аб выхадзе саюзных рэспублік, таму што ў Літве не праводзіўся рэферэндум аб выхадзе са складу СССР.

Законапраект пакуль толькі зарэгістраваны ў Дзярждуме і накіраваны яе старшыні. Ці будзе гэтая ініцыятыва мець нейкі працяг, пакуль невядома.