Данія не ўхваляе "справядлівае размеркаванне ўцекачоў" паміж дзяржавамі ЕС

У кіруючай партыі Даніі занепакоеныя тым, што цяпер права на прытулак у Даніі прадстаўляецца 90% тых, хто яго прасіў. У 2004 года, калі партыя Расмусэна таксама знаходзілася ва ўладзе, сітуацыя была адваротнай і 90% мігрантаў атрымлівалі адмову.



Данія не мае намеру далучацца да агульнаеўрапейскай палітыкі ў дачыненні да бежанцаў з краін Афрыкі і Блізкага Усходу і не падтрымлівае ідэю аб так званым справядлівым размеркаванні ўцекачоў паміж дзяржавамі ЕС, паведамляе tass.ru.

Пра гэта заявіла міністр па пытаннях інтэграцыі і іміграцыі Даніі Інгер Сцёйберг: "У Еўропе і Даніі зараз склалася асаблівая сітуацыя, і яна, безумоўна, патрабуе асаблівых мер. Тым не менш, мы заўсёды казалі пра тое, што не хочам быць часткай агульнаеўрапейскай палітыкі ў адносінах да бежанцаў. Нават на часовай аснове. Пры гэтым мы працягваем цесна ўзаемадзейнічаць з іншымі краінамі па гэтай тэме", — адзначыла кіраўнік ведамства.

Сцёйберг адмовілася адказваць на пытанне пра тое, колькі бежанцаў магла б прыняць Данія, аднак падкрэсліла, што лічыць празмернай колькасць асобаў, што зараз просяць прытулку ў скандынаўскім каралеўстве.

У 2014 годзе колькасць мігрантаў, якія звярнуліся па прытулак у Даніі, падвоілася ў параўнанні з 2013 годам, і склала 14,8 тысяч чалавек. Палова з іх — выхадцы з Сірыі. Пасля гэтага левацэнтрысцкі ўрад Хеле Торнінг-Шміт прыняў шэраг мер, накіраваных на тое, каб знізіць гэты паказчык. Для тых, хто просіць прытулак, быў уведзены спецыяльны, дзеючы толькі на працягу года, від на жыхарства, які не дае сваякам яго ўладальніка права падаць дакументы на атрыманне візы дзеля ўз'яднання сям'і. Пасля праведзеных у чэрвені парламенцкіх выбараў, па выніках якіх да ўлады прыйшла Ліберальная партыя Ларса Расмусэна, быў таксама ўдвая паніжаны памер дапамогі для беспрацоўных імігрантаў. Аднак мігранты могуць атрымаць ад дзяржавы дадатковыя грошы, здаўшы моўны экзамен.

У выніку наплыў мігрантаў скараціўся, колькасць тых, хто прасіў прытулку за першыя 7 месяцаў гэтага года склала толькі каля 6 тысяч чалавек. Паказальна і тое, што сярод 300 бежанцаў з Сірыі і Іраку, якія прыбылі ў Данію з Германіі ў гэтыя выхадныя, толькі 100 чалавек падалі прашэнні аб прытулку, астатнія ж адправіліся далей — у Фінляндыю і Швецыю.