У Мінску можа адбыцца сустрэча трохбаковай кантактнай групы па Украіне
У бліжэйшы час у Мінску можа адбыцца сустрэча трохбаковай кантактнай групы (Украіна — Расія — АБСЕ) па Украіне з удзелам данбаскіх сепаратыстаў. Пра магчымасць правядзення чарговага пасяджэння групы паведамілі прадстаўнікі бакоў канфлікту.
У прыватнасці, паводле інфармацыі ўкраінскага інтэрнэт-рэсурсу Gazeta.ua, прадстаўнік Кіева ў кантактнай групе Леанід Кучма 6 сакавіка заявіў: "Мы не выключаем верагоднасці такой сустрэчы".
ДНР выступае за правядзенне вочнай сустрэчы кантактнай групы. Паводле слоў Пушыліна, на гэтай сустрэчы ДНР прапаноўвае абмеркаваць праблемы абмену палоннымі і амністыі ўдзельнікаў канфлікту ў Данбасе, паведамляе Данецкае агенцтва навін.
12 лютага ў Менску прайшлі шматгадзінныя перамовы ў фармаце „нармандскай чацвёркі” лідараў Украіны, Расеі, Францыі і Германіі. Паралельна ў Менску праходзіла сустрэча трохбаковай кантактнай групы па ўрэгуляванні сітуацыі ва Украіне. У выніку быў прыняты комплекс мер па выкананні менскіх пагадненняў, падпісаных у верасні 2014 года.
Пасля лютаўскай сустрэчы ў Менску прадстаўнікі кантактнай групы працавалі ў рэжыме відэаканферэнцый. Апошняя відэаканферэнцыя адбылася 3 сакавіка.