Лукашэнка пракаментаваў начныя сутыкненні з АМАПам

«Гэта добра, што АМАПаўцы іх утрымалі. Калі б яны дайшлі да Палаца незалежнасці, там ужо іншы расклад: служба бяспекі і антытэрор», — цытуе Лукашэнку onliner.by са спасылкай на БелТА.

«Тое, пра што я казаў, гэта ўсё пацвярджаецца. Калі хтосьці не верыў, то ён цяпер у гэта паверыў. То-бок нам спрабуюць гэтую заварушку падкінуць. Я папярэджваў: майдану не будзе, як бы камусьці гэтага ні хацелася. Таму трэба ўціхамірыцца, супакоіцца, — адзначыў Лукашэнка.  — А бацькам трэці раз кажу паглядзець, дзе іх чада, каб не было потым балюча. каб не ахалі, не охалі».
— Паранена недзе 25 рабят з АМАПу. Ёсць пераломы рук, ног. Спецыяльна, мэтанакіравана білі па гэтых рабятах. Яны адказалі. Чаго цяпер рыдаць і плакаць? Таму адказ будзе адэкватны. Краіну разарваць мы не дазволім.
Аляксандр Лукашэнка распавёў, што, збіраючы па крупіцах інфармацыю напярэдадні, ужо было бачна, што можа быць.
— Канешне, гэта не тое, што хацелася (арганізатарам акцый. — Заўв. БелТА.). Хацелася, як я казаў, распаліць пажар у цэнтры Мінска, хапаць галавешкі і раскідваць па ўсім Мінску. Канешне, гэта ў іх не атрымалася. Дзесьці, можа, і мы дапусцілі нейкія памылкі, дзесьці былі промахі.  Я таксама шчыра прызнаваўся, што мы яшчэ не ўсе ведаем, чаго яны хочуць.
Паведамляецца нібыта пра факты, пра якія Лукашэнку даклалі «літаральна гэтай раніцай».
— Па адной размове мы бачым лялькаводаў. Адна з ліній гэтых лялькаваодаў — Чэхія. Сёння ўжо з Чэхіі кіруюць нашым аб'яднаным штабам, дзе, прабачце мяне, сядзяць гэтыя авечкі, нічога не разумеючы, што ад іх хочуць. Я даручыў выдаць гэтую інфармацыю ў СМІ, каб убачылі, чаго яны хочуць. Яны працягваюць насядаць, працягваюць патрабаваць: выводзьце людзей на вуліцу і вядзіце перамовы з уладамі аб добраахвотнай здачы ўлады, — заявіў Аляксандр Лукашэнка.
— То-бок Лукашэнка, які знаходзіцца на чале вертыкалі ўлады добраахвотна пры 80% галасоў павінен перадаць ім уладу. Гэта адтуль ідуць каманды. Трэба аддаць належнае нашым мясцовым — яны абураныя да мяжы і кажуць: ды гэта немагчыма, у Беларусі не тая сітуацыя, каб весці перамовы. Карацей, спрабуюць кіраваць працэсам з-за мяжы. Я пра Польшчу не кажу. Там ужо ўсе аселі і таксама пачынаюць дзёргаць за нітачкі. Я не кажу пра Украіну (адтуль ехалі). Гэта, перакананы, не дзяржаўная палітыка, але там хапае гэтых майданутых, пра якіх я казаў. У тым ліку, на жаль, з Расіі пэўны прыток людзей.
Кіраўнік краіны пры гэтым звярнуў увагу, што гэтыя прыезджыя не лезуць самі на штыкі.
— Яны на штыкі пацаноў кінулі. Вы ж бачылі, хто сёння па начах там бадзяўся і спрабаваў правакаваць міліцыю. і не проста правакаваць. Вы заўважылі — яны ўжо штурмам спрабавалі ўзяць ці тое РУУС, ці тое УУС. Яны ў Наваградку і Карэлічах, па-мойму (гэтая інфармацыя пацвярджаецца), штурмам хацелі ўзяць органы ўлады.
— Але самае дзіўнае, што мяне насцярожыла ноччу: з вечара мы атрымалі аператыўную інфармацыю ад гэтага так званага аб'яднанага штаба. Хтосьці ж дадумаўся іх разам сабраць у адзін будынак. І журналістаў яшчэ апазіцыйных. Усяго недзе 55 чалавек. І з іх ёсць яшчэ чалавек, які, напэўна, з галавой сябруе, — патэлефанаваў нам і папрасіў дзяржаву ўзяць пад ахову гэты офіс. Спужаліся. Патрэбная была сакральная ахвяра. Разумееце, атачылі гэты офіс, і хто яго ведае, хто атачыў... І нам даваялося 120 чалавек выдзеліць для таго, каб кантраляваць сітуацыю вакол гэтага офісу.  Не дай Бог адкруцілі б галаву адной з іх ці камусьці, мы б адмываліся гадамі. Таму вымушаныя былі ўзяць іх пад ахову. Яны гэта не цэняць. Хутка ацэняць. Але мы разбярэмся з кожным, хто штурхае гэтых пацанятаў на беспарадкі. Думаю, што і ў іх мазгі павернуцца ў патрэбным кірунку, і яны зразумеюць, што проста паляць пад сваімі нагамі зямлю. Дапусціць гэтага мы не можам, — сказаў Аляксандр Лукашэнка.
— Але калі ў 200 метрах ад Палацу незалежнасці збіраюць натоўп, і па тэлефоне мы чуем: нам трэба тысяч 100, каб ісці на штурм Палаца незалежнасці... Якая рэакцыя будзе праваахоўных органаў? Гэта добра, што АМАПаўцы іх утрымалі. Калі б яны дайшлі да Палаца незалежнасці, там ужо іншы расклад, там Служба бяспекі працуе, антытэрор. І гэта б мала не падалося.
Таму трэба сказаць дзякуй гэтым рабятам  — АМАПаўцам — яны іх убераглі ад крытычнага кроку. Сітуацыя была не катастрафічнай, але даволі небяспечнай для людзей, якіх штурхнулі на вуліцы, — падсумаваў Лукашэнка.