Культура разбівае дыктатуру. У Даўгаўпілсе адкрылася выстава плакату, прысвечаная Беларусі

 З дапамогай двух дзясяткаў выразных плакатаў мастак Pan Zmi Thor (@zmithor) разбурае стэрэатыпы варожай прапаганды пра ідэнтычнасць Беларусі ў свядомасці гледачоў. 

На думку мастака, выстава не толькі канстатуе складаную цяперашнюю сітуацыю ў суседняй з Латвіяй краіне, але і ўмацоўвае надзею на вызваленне Беларусі, надзею на сяброўскую, цывілізаваную, квітнеючую і еўрапейскую будучыню краіны. Горад Даўгавпілс быў абраны для экспазіцыі праз сваю блізасць да беларускай мяжы.

З прамовай на ўрачыстым адкрыцці выставы выступіла сябра парламенцкай групы падтрымкі Дэмакратычнай Беларусі Mairita Lūse. Імпрэза адкрыцця завяршылася акустычным канцэртам вядомага беларускага музыкі Аляксандра Памідорава.

Выстава арганізавана намаганнямі дыяспары беларусаў Латвіі Supolka.LV на пляцоўцы культурніцкага цэнтра New East. Экспазіцыя плакатаў працягнецца да 30 красавіка. Уваход свабодны.