Журналіста «КП» Генадзя Мажэйку пакінулі за кратамі, але абвінавачання яшчэ няма

З моманту затрымання журналіста «Комсомольской правды в Беларуси» Генадзя Мажэйкі ўжо прайшлі 72 гадзіны, за якія журналісту павінны прад’явіць абвінавачанне або адпусціць.

«Мяркуючы па тым, што ён не выйшаў з ізалятара, да яго ўжытая мера стрымання ў выглядзе заключэння пад варту», — паведаміў прадстаўнік «Комсомольской правды» Валянцін Алфімаў.

Раней галоўны рэдактар «Комсомольской правды» Уладзімір Сунгоркін сказаў, што Генадзя Мажэйку будуць абараняць два адвакаты.

Журналіста выдання Генадзя Мажэйку затрымалі ў ноч на 2 кастрычніка, пасля чаго змясцілі ў ізалятар на Акрэсціна ў Мінску, у яго дома правялі ператрус, нагадвае «Свабода». Дагэтуль дакладна невядома, у якой краіне затрымалі Мажэйку. Беларускія сілавікі сцвярджаюць, што зрабілі гэта ў Мінску, але ёсць таксама інфармацыя пра тое, што журналіста «КП» вывезлі наўпрост з Масквы.

4 кастрычніка прэс-сакратар прэзідэнта Расіі Пуціна Дзмітрый Пяскоў заявіў, што Крэмль апавясціў Лукашэнку аб тым, што выступае супраць блакавання СМІ на беларускай тэрыторыі.

Праз матэрыял пра забітага супрацоўнікамі КДБ праграміста Андрэя Зельцэра ў краіне заблакавалі сайт «Комсомольской правды в Беларуси»: там з'явілася нататка, дзе адна з яго аднакласніц добра выказалася пра забітага мужчыну. Аўтарам той нататкі якраз быў Генадзь Мажэйка.

За негатыўныя каментары ў адрас забітага ў той перастрэлцы супрацоўніка КДБ Дзмітрыя Федасюка сілавікі затрымалі ўжо звыш 110 чалавек.