З Фарнага касцёлу ў Гродне знялі фігуры святых (фота)
Каштоўныя барочныя скульптуры знятыя часова — на рэстаўрацыю. Так, некалькі год таму былі адрэстаўраваныя фігуры апосталаў Пятра і Паўла, якія сустракалі наведнікаў касцёла ля ўваходу.
Агулам былі знятыя тры драўляныя скульптуры: св. Тэрэзы, невядомага святога і непасрэдна св.Францішка Ксаверыя, імем якога названы касцёл. Калі фігуры з дапамогай крану спусцілі ўніз, стала бачна, наколькі яны пашкоджаныя часам: пэўныя кавалкі абабітыя, іншыя ледзве трымаюцца. Уся аперацыя заняла каля трох гадзін.
Фігуру св. Францішка, праўдападобна, знялі з п’едэсталу ўпершыню за 300 год — сваё месца ён займаў ад часу пабудовы касцёлу ў першай палове XVIII ст. З двума іншымі скульптурамі — яшчэ цікавей. Драўляныя выявы св.Тэрэзы ды невядомага святога з барадой першапачаткова стаялі зусім не на Фарным, а на Кармеліцкім касцёле і былі адтуль знятыя толькі на пач. ХХ ст., калі будынак касцёлу разбіралі на цэглу для будаўніцтва казармаў для рускіх жаўнераў.
Пробашч гарадзенскай Катэдры Станіслаў Кучынскі спадзяецца, што фігура св.Францішка будзе не толькі адноўленая, але яшчэ і атрымае пазалочаны крыж. Падобная практыка ўжо ёсць: пазалочаныя элементы вярнуліся на скульптуры апосталаў, якія былі адрэстаўраваныя ў першую чаргу.