Выявілася, што песні, якія ўхваляюць рэжым і сілавікоў, складае пад псеўданімам нявестка Лукашэнкі
Аналітык Сяргей Чалы распавёў, хто такая паэтка Ганна Сялук — аўтар мноства песень на дзяржаўных канцэртах.
Як адзначыў Сяргей Чалы ў праграме на Youtube, у жанры «карпаратыў для сілавікоў» Ганнай Сялук напісаныя песні для МУС, войска, МНС, а таксама гімн Генпракуратуры, піша «Салідарнасць».
Пра саму паэтку, як сказаў аналітык, «вядома злачынна мала» — толькі імя Ганна Сялук. Пры гэтым з ёй няма ні відэа, ні фота. Адзінае
інтэрв'ю паэтка дала скандальнай «Мінскай праўдзе» з ілюстрацыяй у выглядзе
самотнага мікрафона.
Чалы звярнуў увагу: нягледзячы на тое, што паэтка, па яе
словах, пачала пісаць песні ўсяго два гады таму, яна змагла за гэты час
дабрацца «да самай вяршыні прыдворных трубадураў».
Сярод яе апошніх песень — «Ах, Аляксандр» і «Бульба дэнс». У кліпе апошняй выкарыстана хроніка, дзе збіраюць бульбу
Лукашэнкі, на што, натуральна, павінен быць дазвол з самага верху.
Больш за тое, зараз песню прасоўваюць з выкарыстаннем
адміністрацыйнага рэсурсу — напрыклад, паказваюць у кінатэатрах перад фільмамі.
Дык хто ж такая Ганна Сялук? Чалы звярнуў увагу на яе месца
працы — ТАА «Музычная медыякампанія», дзе намеснікам дырэктара працуе
Таццяна Кулакова, пастаянная спадарожніца Ганны Лукашэнкі, жонкі Дзмітрыя
Лукашэнкі. У сацсетках яна пісала пра «не публічную сястру», у якой «супермегаталент».
Ганна Сяргееўна Лукашэнка — скарочана і ёсць Ганна Ся-лук, адзначыў
аналітык. Акрамя таго, нявестцы кіраўніка таксама 42 гады, як і паэтцы.
У інтэрв'ю Ганна Сялук згадала пра свайго дзядулю Цэханскага
Віктара Іванавіча, які ў Вялікую Айчынную вайну сышоў ваяваць сямнаццацігадовым
хлопцам. Ён з'яўляецца дзядулем Ганны Лукашэнкі па мацярынскай лініі, адзначыў
аналітык.
— У чарговы раз мы пераконваемся, што для імітацыі любові і падтрымкі Аляксандра Лукашэнкі патрабуецца ўдзел людзей з самага блізкага кола самога Лукашэнкі. Як Наталля Эйсмант і Дзмітрый Баскаў палявалі на стужачкі ў пратэсных дварах, імітуючы ўсенародны рух, так і вернападданіцкія песні складае яго ж нявестка, — сказаў на заканчэнне Чалы.
