«Вінаватым сябе не прызнаў». Маладзечанцу прысудзілі тры гады калоніі за каментары

Мінскі абласны суд у закрытым пасяджэнні вынес абвінаваўчы прысуд жыхару Маладзечна Сяргею Алексяеўскаму, абвінавачанаму ў распальванні сацыяльнай варожасці (ч. 1 арт. 130 КК) і абразе прэзідэнта і прадстаўнікоў улады.

Справу разглядала суддзя Алена Міснік, паведамляюць праваабаронцы.

Алексяеўскага затрымалі 1 кастрычніка 2021 года і да суда ўтрымлівалі ў следчай турме №8 Жодзіна.

Па матэрыялах абвінавачання, палітзняволены Сяргей Алексяеўскі, з чэрвеня 2020 года па верасень 2021 года з дапамогай  электронных прылад «размясціў у розных агульнадаступных групах сацыяльнай сеткі «Вконтакте» каментары, накіраваныя на стварэнне ў аўдыторыі ілжывага ўяўлення аб нелегітымнасці дзеянняў праваахоўнага блока пры выкананні службовых абавязкаў, узбуджэнне нянавісці, сацыяльнай варожасці і варажнечы па прыкмеце прыналежнасці да прафесіі».

Ён жа ў названай сацыяльнай сетцы публічна абразіў Лукашэнку і іншых прадстаўнікоў улады. Усе гэтыя каментары былі пакінутыя пасля гібелі ў мінскай кватэры супрацоўніка КДБ Дзмітрыя Федасюка і ІТ-спецыяліста Андрэя Зельцэра.

Падчас папярэдняга следства і ў судовым пасяджэнні Алексяеўскі вінаватым сябе не прызнаў.

Судовая калегія па крымінальных справах Мінскага абласнога суда 13 ліпеня вынесла абвінаваўчы прысуд —тры гады калоніі агульнага рэжыму са штрафам у 100 базавых велічынь.

20 чэрвеня 2022 года КДБ унёс Сяргея Алексяеўскага ў спіс «асоб, якія маюць дачыненне да тэрарыстычнай дзейнасці».