Відэа «Мы беларусы» абвешчана «экстрэмісцкім». Хронікі рэпрэсій 29 жніўня
Міністэрства інфармацыі па рашэнні суда ўключыла ў спіс «экстрэмісцкіх матэрыялаў» сацыяльныя сеткі блогеркі з псеўданімам «Данута Хлусня». Адзін з першых ролікаў на яе YouTube-канале — віруснае відэа з дзяўчынкай, якая плача, калі чытае ўслых радок «Мы — беларусы» з дзіцячай кнігі, піша «Люстэрка».
Тэкст на старонцы кнігі пачынаецца са слоў: «Мы — беларусы, Мы — маленькія грамадзяне, нам усюды добра, у парку, у полі, на рэчцы». Відэа з'явілася на ютубе ў 2016 годзе і набрала больш за 270 000 праглядаў.
Крыніца: ДАНУТА [ youtube ]
За сем месяцаў 2025-га году ў Гродзенскай вобласці разгледжана 280 адміністрацыйных справаў за «распаўсюд экстрэмізму»
Паведамляецца, што гэта ў 4 разы менш, чым за аналагічны перыяд мінулага году.
Нашы аўтары за кратамі. У палоне рэжыму: Мікола Дзядок — 1751 дзень, Дзяніс Івашын — 1631 дзень.
Палітзняволены святар Анджэй Юхневіч змешчаны ў калонію ў Бабруйску
Пра гэта нядаўна даведаліся вернікі, піша @katolik_life.
Былы пробашч каталіцкай парафіі ў Шуміліне, асуджаны на 13 гадоў зняволення, апынуўся ў той жа калоніі, дзе ўтрымліваюць і другога палітзняволенага каталіцкага святара — ксяндза Генрыха Акалатовіча.
У «Спіс экстрэмістаў» дадалі яшчэ 14 прозвішчаў — цяпер у ім 5677 чалавек
29 жніўня МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».
У спіс дадалі асуджанага за «распальванне варожасці» і «заклікі да санкцый» Андрэя Бесава, а таксама яшчэ 13 чалавек, асуджаных паводле арт. 342 КК.
«Вясна» публікуе апошнюю версію спіса.
«У РАУС зацягнулі нават сямігадовую дачку». Да родных рагачоўскага актывіста Дзяніса Дашкевіча прыходзяць сілавікі
У 2023 годзе дома ў Дашкевіча адбыўся ператрус у сувязі з распачатай у дачыненні да яго крымінальнай справай. Па словах актывіста, цяпер сілавікі зноў пачалі прыходзіць да ягоных родных.
«Нядаўна дайшло да таго, што ў поўным складзе выклікалі ў РАУС, у тым ліку непаўналетніх дзяцей, і прымусілі паказваць тэлефоны, дапытвалі, пыталі пра маё месцазнаходжанне. Казалі, што я ў вышуку і допыты праводзяць па санкцыі пракурора. Прычым у РАУС зацягнулі нават сямігадовую дачку», — распавёў Дашкевіч «Люстэрку».
30 ліпеня пракурор выдаў следчаму санкцыю на правядзенне агляду камп'ютарнай тэхнікі маці, жонкі і дзяцей Дашкевіча.
«У выніку ў жонкі і дзяцей агледзелі тэлефоны на тэрыторыі РАУС. На наступны дзень дашлі да маці ў Гомелі, там тэхнікі няма, але ў яе таксама агледзелі тэлефон. Ва ўсіх выпадках фатаграфавалі кантакты і старонкі ў сацыяльных сетках».