У Жлобіне з'явіўся свой АМАП

Ва ўрачыстай абстаноўцы ў Жлобіне пачало дзейнічаць падраздзяленне атрада міліцыі асаблівага прызначэння (АМАП). На Гомельшчыне гэта першы такі атрад пасля абласнога цэнтра, удакладняе «Радыё Свабода».

На цырымонію прыехаў начальнік УУС Гомельскай вобласці Аляксандр Васільеў, які ад імя міністра ўнутраных спраў падарыў міліцыянтам службовы аўтамабіль.

Як нагадвае гомельскі сайт «Моцныя навіны», у жніўні мінулага года Жлобін стаў адным з самых пратэставых райцэнтраў краіны.
Акрамя таго, што тысячы гараджан патрабавалі новых выбараў і асуджалі гвалт сілавікоў, страйкавалі на Беларускім металургічным заводзе.
Кіраўніцтва прадпрыемства спачатку паабяцала выслухаць людзей і не караць за страйк, аднак у лістападзе да актыўных удзельнікаў прыйшлі з ператрусамі. Ігара Поварава, Аляксандра Баброва, Яўгенія Говара, Паўла Магідава асудзілі ад 2,5 да на 3 гадоў па крымінальнай справе паводле ч. 1 арт. 342 КК («Арганізацыя групавых дзеянняў, што груба парушаюць грамадскі парадак»). Павел Магідаў паспеў з'ехаць з Беларусі.
Таксама па крымінальных і адміністрацыйных артыкулах былі асуджаныя дзясяткі іншых гараджан.
Як пішуць «Моцныя навіны», некаторыя жыхары Жлобіна кажуць, што ад міліцыянтаў чулі: да такога пратэсту ўлады былі зусім не гатовыя.