У Беларусі зноў павялічылася колькасць палітвязняў

Праваабаронцы прызналі палітычнымі зняволенымі яшчэ 10 чалавек. Цяпер іх ужо 1101.

Палітвязнямі прызнаныя Андрэй Акушка, Дзмітрый Качаноўскі, Валерый Ларчык, Аляксандр Лобан, Віталь Маскалёў, Віталь Марухленка, Мікалай Сасноўскі, Аляксандр Сафонаў, Раман Скапцоў і Наталля Сцепанцова.  

Ларчык асуджаны на 2 гады абмежавання волі з накіраваннем у папраўчую ўстанову адкрытага тыпу за «абразу Лукашэнкі».

Скапцоў за тое ж атрымаў 2 гады і 6 месяцаў «хіміі».

Сасноўскі, Сафонаў, Сцепанцова і Маскалёў асуджаныя за «абразу прадстаўніка ўлады» (апошні — яшчэ і за «пагрозу прадстаўніку ўлады гвалтам») на тэрміны ад 1 года 6 месяцаў да 3 гадоў «хіміі».

Качаноўскі атрымаў тры гады абмежавання волі з накіраваннем у папраўчую ўстанову адкрытага тыпу за «здзек з дзяржаўнай сімволікі» і «абразу прадстаўніка ўлады».

Лобан і Марухленка ўзятыя пад варту за каментары ў сацсетках па «справе Зельцэра», Акушка — за «абразу Лукашэнкі і прадстаўніка ўлады».