Пад дажджом у Кобрыні прайшоў Марш новай Беларусі (фота)
Нягледзячы на дождж, 23 жніўня каля 500 жыхароў Кобрына на Берасцейшчыне далучыліся да нацыянальнага Маршу за новую Беларусь.
Калі ўдзельнікі маршу сабраліся на пляцы Волі ў цэнтры гораду, да іх звярнуўся супрацоўнік Кобрынскага РАУС, маёр міліцыі Міхась Вайтовіч. Ён папярэдзіў, што акцыя несанкцыянаваная. У адказ грамадзяне патлумачылі спадару Вайтовічу, што адзінай крыніцай дзяржаўнай улады ў краіне з’яўляецца народ. Аднак замест таго, каб бараніць народ і яго правы, дзяржава парушае правы грамадзянаў, збівае іх, хлусіць людзям і знявольвае іх. У гэтай сітуацыі дзяржава страціла давер народа, які вырашыў самастойна бараніць свае правы і свабоды.
Маршам пад бел-чырвона-белымі сцягамі па ходніках вуліцаў вакол цэнтру горада прайшлі кобрынчане розных узростаў і прафесій. Яны пратэставалі супраць фальсіфікацыі вынікаў прэзідэнцкіх выбараў і гвалту сілавікоў 10-12 жніўня падчас жорсткіх затрыманняў грамадзян і іх закратавання.
Марш суправаджаўся песняй Віктара Цоя «Перамен!» і беларускамоўнай версіяй твору іспанскага барда Луіса Л’яха «Муры», што сталі музычнымі сімваламі сёлетняй Рэвалюцыі годнасці ў Беларусі.
Удзельнікі маршу скандавалі «Кобрын, выходзь!», «Лукашэнка, сыходзь!», «Лукашэнку ў аўтазак!», «Пераменаў!», «Свабоду палітвязням!», «Ганьба!», «Не забудзем, не даруем!», «Верым, можам, пераможам» і «Жыве Беларусь!» Месцічы цёпла віталі калону падчас маршу, а часам і далучаліся да яе.
Марш насіў выключна мірны характар. Пратэстоўцы паводзілі сябе інтэлігентна, праяўлялі цярпімасць да іншадумцаў і правакатараў, у адносінах да іх не дапускалі аніякіх праяваў агрэсіўнасці і нядобразычлівасці, а ўвогуле – аніякіх парушэнняў грамадскага парадку. Міліцыянты наглядалі за маршам з аўтамабіляў, але не перашкаджалі пратэстоўцам.
Пасля вяртання на пляц Волі ветэран беларускага нацыянальна-дэмакратычнага руху, старшыня Кобрынскай грамадскай каардынацыйнай рады народнага даверу Алесь Мех выказаў спадзяванне, што мірны пратэст грамадзянаў дасць свой плён і прывядзе да пакарання сілавікоў, вінаватых у жорсткіх затрыманнях, збіцці і катаваннях мірных людзей, а таксама да вызвалення палітвязняў і правядзення новых сумленных выбараў галавы дзяржавы.
