Міліцыя склала больш за 100 пратаколаў на ўдзельнікаў фестывалю ў Браславе

На фестывалі «Viva, Браслаў» больш за ўсіх, відаць, працавала міліцыя, паведамляе «Беларускі партызан».

У першы дзень на фестывалі дзяжурылі 75 міліцыянтаў, а ў другі — ужо больш за 100.
У выніку ў першы вечар да адміністрацыйнай адказнасці было прыцягнута 25 чалавек (з іх 7 непаўналетніх), а ў другі — з суботы на нядзелю — складзены 54 адміністрацыйныя пратаколы.

З іх 38 — за распіванне спіртных напояў ці знаходжанне ў грамадскім месцы ў п'яным выглядзе (11 непаўналетніх), 7 — за дробнае хуліганства. Трое бацькоў будуць адказваць за тое, што ў позні час іх дзеці знаходзіліся без нагляду дарослых, 6 асоб затрыманыя за ўцягванне непаўналетніх у антыграмадскія паводзіны.
Акрамя таго, як паведамляе мясцовая прэса, быў выяўлены факт незаконнага абароту наркотыкаў.
Viva Браслаў — гэта адзіны буйны фестываль у Беларусі з пляжам, шырокай спартыўнай праграмай і намётавым мястэчкам.

Паводле nn.by