Магілёўскага праваабаронцу, асуджанага раней на «хімію», адправілі ў калонію на 2 гады

Праваабаронцу і аднаго з лідараў леташніх пратэстаў у Магілёве Валадара Цурпанава, прызнанага палітвязнем, адправілі ў калонію агульнага рэжыму на 2 гады за ўхіленне ад адбывання пакарання ў папраўчай установе адкрытага тыпу (арт. 415 КК), паведамляе «Свабода».

Валадар Цурпанаў будзе абскарджваць прысуд.

Падставай для крымінальнага пераследу асуджанага на тры гады «хіміі» актывіста сталі дысцыплінарныя спагнанні за парушэнне ўнутранага распарадку.

Працэс праходзіў у судзе Круглянскага раёна пад старшынствам суддзі Дзмітрыя Сасноўскага. Дзяржаўнае абвінавачанне прадстаўляў пракурор раёна Міхаіл Андросенка. Падсудны бараніў сябе сам.

У апошнім слове Валадар Цурпанаў заявіў, што яго незаконна і несправядліва ўзялі пад варту. Ён назваў інкрымінаваны яму артыкул «рудыментам ГУЛАГаўскай сістэмы пакарання», які мае быць скасаваным.

Цурпанаў лічыць, што яго зняволенне з’яўляецца помстай за тое, што ён дамогся сустрэчы з кіраўнікамі горада і вобласці, на якой агучыў патрабаванні пратэстоўцаў. Згадаў, што «край знаходзіцца ў працэсе негвалтоўнай рэвалюцыі», мэта якой палягае ў выбудоўванні беларускай дзяржавы, і гэта, настойваў ён, абумовіла яго зняволенне.

За падтрымку ў няволі Цурпанаў падзякаваў жонцы, сваякам, калегам-праваабаронцам, а таксама сябрам ды шматлікай грамадзе тых, хто дасылаў яму лісты.

На самім працэсе падсудны віны не прызнаў і настойваў, што «следства ў яго справе не было». Справу Цурпанаў назваў сфабрыкаванай і прасіў суд спыніць крымінальны пераслед праз адсутнасць складу злачынства.

Валадар Цурпанаў адбываў пакаранне за абразу дзвюх магілёўскіх суддзяў Вікторыі Паляковай і Вольгі Краўчанкі. У Круглянскай папраўчай установе № 46 актывіст прабыў з 5 лютага па 10 сакавіка 2021 года. За гэты час на яго наклалі тры спагнанні і паставілі на прафілактычны ўлік як схільнага да экстрэмісцкай і іншай дэструктыўнай дзейнасці.

Паводле абвінавачання, дысцыплінарныя спагнанні на Цурпанава накладаліся за тое, што ён у недазволены час ляжаў і сядзеў на ложку, яго спальнае месца не было засланае належным чынам, а на ім і на тумбачцы ляжалі асабістыя рэчы.

Асуджаны адмовіўся працаўладкоўвацца на вызначанае адміністрацыяй спецкамендатуры прадпрыемства. Згодна з нормамі заканадаўства, асуджаны абавязаны працаваць там, куды яго накіроўваюць.

Падставамі для пастаноўкі на прафілактычны ўлік, як даводзіў адзін з супрацоўнікаў спецкамендатуры, стала адмова асуджанага падпісаць добраахвотнае абавязанне аб правапаслухмяных паводзінах ды нежаданне ўдзельнічаць у гуртках самадзейнасці. Ён нагадаў, што Цурпанаў не прызнаў віны за ўчыненае ім у Магілёве злачынства.

Супрацоўнікі спецкамендатуры на судзе казалі, што Цурпанаў патрабаваў, каб з ім гаварылі па-беларуску і афармлялі дакументы на беларускай мове. Гэтага яны зрабіць не маглі, бо справаводства ў іх рускамоўнае. Яны прызнаваліся, што з такім асуджаным, як Цурпанаў, сутыкнуліся ўпершыню.

Паводле слоў Цурпанава, кіраўніцтву спецкамендатуры ён прапаноўваў арганізаваць курсы беларускай мовы. Адмову гаварыць з ім па-беларуску лічыў дыскрымінацыяй і парушэннем канстытуцыйных правоў.

На судзе ён прасіў, каб з ім таксама гаварылі па-беларуску, але пракурор і суддзя не задаволілі хадайніцтва, патлумачыўшы адмову тым, што ў Беларусі дзве дзяржаўныя мовы.

Хто такі Цурпанаў

Валадар Цурпанаў — актывіст апазіцыі з канца 1980-х гадоў. Кіраваў абласной арганізацыяй Партыі БНФ. У 1997-м галадаў 10 дзён у ізалятары. У жніўні 2020-га дамогся сустрэчы пратэстоўцаў з кіраўнікамі гарадской і абласной выканаўчай улады Магілёва. 1 верасня 2020-га прыйшоў на ўрачыстую лінейку ў 43-ю магілёўскую школу і заклікаў педагогаў, якія працавалі ва ўчастковых камісіях, пакаяцца за фальсіфікацыю выбараў. Яго затрымалі і асудзілі на 20 дзён адміністрацыйнага арышту. Агулам за чатыры месяцы пратэстаў правёў у няволі 43 дні. 10 дзён трымаў сухую галадоўку, пратэстуючы супраць незаконнага зняволення. Быў шпіталізаваны. Да зняволення працаваў мантажнікам у прыватнай арганізацыі.