Латвія абвясціла надзвычайны рэжым на мяжы з Беларуссю праз мігрантаў

Урад Латвіі абвясціў рэжым надзвычайнай сітуацыі на мяжы з Беларуссю ў сувязі з наплывам мігрантаў, піша «Delfi».

Паводле звестак выдання, рэжым НС уводзіцца 11 жніўня і будзе дзейнічаць да 10 лістапада ў Лудзенскім, Краслаўскім, Аўгшдаўгаўскім краях і горадзе Даўгаўпілс.

Памежнікам дазволена выкарыстоўваць фізічную сілу і спецыяльныя сродкі, каб вяртаць у Беларусь людзей, якія незаконна перайшлі мяжу. Ім будуць дапамагаць вайскоўцы і паліцыя.

Дзяржаўная памежная ахова і ўпраўленне па справах грамадзянства і міграцыі змогуць у спрошчаным парадку закупляць тавары першай неабходнасці, прадукты харчавання для мігрантаў. Аблегчаная працэдура будзе прымяняцца і пры правядзенні закупак, звязаных з размяшчэннем мігрантаў.

Увесці рэжым НС напярэдадні прасіла кіраўніца МУС Латвіі Марыя Голубева. Гэта звязана з рэзка павялічаным патокам незаконных мігрантаў, якія спрабуюць перасекчы мяжу. З шостага жніўня мяжу незаконна перайшлі 283 чалавекі, усяго з пачатку года на ўсходняй мяжы памежнікамі затрыманыя 343 парушальнікі.

Начальнік Дзяржаўнай памежнай аховы Гунціс Пуятс раней нагадаў, што ў цэнтрах размяшчэння практычна няма месцаў, таму парушальнікаў мяжы прыйдзецца сяліць у намётах. Некалькі свабодных месцаў у цэнтрах размяшчэння пакуль ёсць для тых мігрантаў, якія не збіраюцца прасіць прытулку ў Латвіі.

Да гэтага з праблемай павелічэння колькасці незаконных мігрантаў сутыкнулася Літва. З пачатку года тут былі затрыманыя больш за чатыры тысячы чалавек. Улады Літвы абвясцілі рэжым НС і пачалі будаўніцтва на мяжы сцены з калючым дротам. Вільня абвінавачвае ўлады Беларусі ў тым, што яны не перашкаджаюць нелегальнаму перасячэнню мяжы. Кіраўнік МЗС краіны 6 жніўня выступіў з заявай, у якой папярэдзіў мігрантаў пра небяспеку падарожжа ў ЕС праз Беларусь