Беларускі камітэт памяці паўстанцаў 1863-1864 гг. сустрэўся з урадам Літвы
23 красавіка 2019 г. у Вільні адбылася сустрэча прадстаўнікоў Беларускага грамадскага камітэта памяці паўстанцаў 1863-1864 гг. з віцэ-канцлерам ўрада Літвы Дэйвідасам Матулёнісам.
Падчас размовы літоўскі палітык паведаміў пра рашэнне Дзяржаўнай камісіі Літвы абраць месцам спачыну паўстанцаў, парэшткі якіх былі знойдзеныя на Замкавай гары ў Вільні, пахавальную неагатыцкую капліцу на славутых віленскіх могілках Росы (Rasų kapinės). Урачыстасць перазахавання плануецца на канец кастрычніка – пачатак лістапада 2019 г. Прозвішчы паўстанцаў будуць напісаныя на трох мовах – літоўскай, польскай і беларускай. Таксама быў прадстаўлены праект мемарыялізацыі магілы паўстанцаў, распрацаваны архітэктарам Рутай Астасевічутэ.
Беларускія ўдзельнікі размовы падзякавалі літоўскіх прадстаўнікаў за прынятае рашэнне і абавязаліся падрыхтаваць спісы паўстанцаў на беларускай мове. Таксама яны звярнулі ўвагу на важнасць удзелу прадстаўнікоў беларускага грамадства ў пахавальных урачыстасцях. У сітуацыі, калі ўлады Рэспублікі Беларусь самаўхіліліся ад ушанавання памяці герояў вызвольнага паўстання і ў чарговы раз спрабуюць выкрэсліць імя Кастуся Каліноўскага з айчыннай гісторыі, сваё слова павінна сказаць беларуская грамадзянская супольнасць. У адказ Дэйвідас Матулёніс заверыў суразмоўцаў, што літоўскія ўлады гатовыя да супрацы з беларускай грамадскасцю.
Паводле прэс-рэлізу