У Расіі пабудуюць порт для беларускага калію?

Беларусь ужо праз год можа пачаць перавалку калійных угнаенняў на партовым тэрмінале ў Расіі, пабудаваным пры ўдзеле айчыннага капіталу. Аб гэтым заявіў Аляксандр Лукашэнка ў інтэрв'ю Уладзіміру Салаўёву.

Лукашэнка расказаў, што расійскі бок прадаставіў пляцоўку, на якой ствараецца дадатковая інфраструктура, каб павялічыць партовыя магутнасці. Па ягоных словах, фінансаванне ідзе за кошт прыватных інвестыцый з Беларусі.
«Так, там будзе свой, 100% нашага грамадзяніна. Я спытаўся, ці патрэбна дапамога. Ён сказаў: "Не, не, усё ёсць, у нас ёсць грошы". Цяпер трэба вельмі моцна актывізавацца, каб з колаў пачалі грузіць гэты хлоркалій, хаця б праз год», — сказаў ён.
Нагадаем, яшчэ ў 2020 годзе Аляксандр Лукашэнка на сустрэчы з губернатарам Ленінградскай вобласці прапанаваў інвеставаць у развіццё партовай інфраструктуры. Тады ў якасці крыніцы фінансавання ён называў рэшткі сродкаў расейскага крэдыту на БелАЭС. Цяпер Лукашэнка не стаў удакладняць, за чые грошы рэалізуецца праект.
«Цяпер вельмі моцны амбасадар Расіі ў Беларусі. Можа, ёсць сэнс такога роду праекты ажыццяўляць, як у савецкі час, калі на праектнае фінансаванне з высокага дзяржаўнага ўзроўню і з аднаго і з другога боку ідзе максімальная дапамога, каб не было ніякіх спроб паўплываць, нагрэць рукі», — сказаў ён.
Паводле яго слоў, пад дапамогай маецца на ўвазе адсутнасць цяганіны пры адводзе зямлі, выдачы дазволаў і г.д.
Нагадаем, з 1 лютага Літоўская чыгунка скасавала кантракт на перавозкі беларускага калію ў порт Клайпеды. Ён быў прызнаны літоўскім урадам не адпаведным патрабаванням нацбяспекі. У раней апублікаваным фрагменце інтэрв'ю Аляксандр Лукашэнка ўзгадваў, што была папярэдняя дамоўленасць аб пастаўках праз Украіну, але яна сарвалася.
Аляксандр Лукашэнка можа гаварыць аб тэрмінале ў расійскім порце Усць-Луга, які ўжо выкарыстоўваецца для перавалкі айчынных нафтапрадуктаў. Тут летась быў запушчаны тэрмінал для перавалкі ўгнаенняў. У 2022 годзе яго магутнасць можа вырасці да 12 млн т. У далейшым яе планавалася павялічыць да 25 млн т. Такі прырост можа забяспечыць перавалку беларускага экспарту, які перавышае 10 млн т калійных угнаенняў. Праўда, паводле інфармацыі расійскай газеты "КоммерсантЪ", тэрмінал планавалася задзейнічаць пад расійскіх кліентаў.
За апошнія два гады Аляксандру Лукашэнку таксама прапаноўвалі выкарыстоўваць порт у Астраханскай вобласці. Сам жа ён заяўляў аб гатоўнасці экспартаваць угнаенні праз Мурманск.
reform.by