Эканамічныя прагнозы на 2024 год: даклад ААН

Арганізацыя Аб'яднаных Нацый апублікавала даклад «Cусветнае эканамічнае становішча і перспектывы на 2024 год», у якім прыведзены прагнозы развіцця сусветнай эканомікі, абазначаны яе асноўныя паказчыкі і тэндэнцыі. Па даных даклада, эканоміка Беларусі мае шанцы на рост.

Minfin.by прачыталі даклад і распавядаюць, чаго чакаюць эксперты ад глабальнай эканомікі, што прагназуюць для эканомікі Беларусі і іншых постсавецкіх дзяржаў.

Сусветная эканоміка

У 2024 годзе ААН чакае паслаблення сусветнай эканомікі. Згодна з прагнозам, глабальны эканамічны рост знізіцца ў бягучым годзе да 2,4% у параўнанні з 2,7% у 2023 годзе.

Прагназуецца, што ў шэрагу буйных развітых краін, асабліва ў ЗША, у 2024 годзе рост замарудзіцца: будуць высокія працэнтныя стаўкі, скарачэнне спажывецкіх выдаткаў і пагаршэнне сітуацыі на рынку працы.

Кароткатэрміновыя перспектывы росту для многіх краін, якія развіваюцца (напрыклад, для краін Лацінскай Амерыкі і Азіі), таксама «пагаршаюцца з-за ўзмацнення жорсткасці фінансавых умоў, скарачэння бюджэтнай прасторы і слабога знешняга попыту».

На думку экспертаў ААН, у 2024 годзе ВУП павялічыцца:

у Кітаі — на 4,7%;

у Бразіліі — на 1,6%;

у ЗША — на 1,4%;

у Японіі — на 1,2%;

у Еўрапейскім саюзе — на 1,2% (у тым ліку ў Іспаніі — на 1,8%, у Францыі — на 0,9% , у Германіі — на 0,7%);

у Вялікабрытаніі — на 0,4%.

Глабальная інфляцыя ў 2024 годзе чакаецца на ўзроўні 3,9%. «Пры гэтым прыкладна ў чвэрці ўсіх краін у стадыі развіцця гадавая інфляцыя перавысіць у 2024 годзе 10%», — лічаць у ААН.

Калі казаць пра рынак працы, то аднаўленне пасля пандэміі праходзіць нераўнамерна. У развітых краінах сітуацыя на рынку працы ўстойлівая, нягледзячы на запавольванне тэмпаў росту. Аднак у многіх краінах, якія развіваюцца, асабліва ў Заходняй Азіі і Афрыцы, ключавыя паказчыкі занятасці яшчэ не вярнуліся да дапандэмійнага ўзроўню.

«Застаецца высокім глабальны гендарны разрыў у занятасці, а гендарны разрыў у аплаце працы не толькі захаваўся, але ў некаторых прафесіях нават павялічыўся», — падкрэслілі эксперты.

Беларусь і постсавецкія краіны

Прагноз ААН мяркуе, што эканоміка Беларусі ў 2024 годзе вырасце на 1,7%. У наступным годзе чакаецца рост айчыннай эканомікі на ўзроўні 2,5%.

У 2024 годзе ВУП Латвіі, на думку экспертаў, вырасце на 2,5%, Польшчы — на 2,4%, Літвы — на 2,0%, Расіі — на 1,3%. Сітуацыя ва Украіне мае высокую ступень нявызначанасці: папярэдні прагноз па ВУП прадугледжвае рост на 3,5%.

Калі разглядаць не толькі суседзяў Беларусі, але і ў цэлым постсавецкія краіны, то лепш за ўсё прагноз па ВУП на бягучы год выглядае для Узбекістана і Туркменістана — рост на 6,0% і 5,9% адпаведна.

Магчымасці росту ВУП у прамысловасці ўжо вычэрпваюцца?

Дынаміка ВУП у іншых дзяржавах прагназуецца такая:

Таджыкістан — рост на 5,6%;

Арменія — на 5,2%;

Казахстан — на 4,8%;

Кыргызстан — на 4,8%;

Грузія — на 4,6%;

Малдова — на 3,4%;

Азербайджан — на 2,6%;

Эстонія — на 2,5%.

Інфляцыя ў Беларусі ў 2024 годзе чакаецца на ўзроўні 4,1% з наступным запаволеннем да 3,9% у 2025 годзе.

Больш высокія паказчыкі на гэты год прагназуюцца для Казахстана (8,0%), Кыргызстана (7,5%), Малдовы (4,9%), Расіі (4,8%), Польшчы (4,5%). Інфляцыя на ўзроўні меншым за 4% чакаецца ў Таджыкістане (3,9%), Літве (3,2%), Латвіі (3,0%), Арменіі (2,6%), Грузіі (2,5%).