Долар і еўра ўсталявалі новы рэкорд. І ён — не апошні

Курс долара на мінулым тыдні дасягнуў максімальнага значэння ўпершыню за больш чым 16 месяцаў. Гэта адбылося на фоне заявы Нацбанка аб дэвальвацыйных рызыках. На гэтым тыдні долар і еўра працягнулі даражэць.

На таргах Беларускай валютна-фондавай біржы 7 жніўня:

• Курс долара вырас на 1,23% — да 3,1543 рубля.
• Еўра падаражэў на 1,51% — да 3,4267 рубля.
• Расійскі рубель патаннеў на 0,5% — да 3,2724 рубля за 100 расійскіх рублёў.
• Курс юаня вырас на 1,5% — 4,3923 рубля за 10 юаняў.

Абнаўленне гадавога максімуму курсу долара да беларускага рубля на мінулым тыдні не стала нечаканасцю. Такі сцэнар і меркаваўся ў папярэдніх прагнозах, піша фінансавы кансультант Міхаіл Грачоў на myfin.by.

У 2022 годзе, а менавіта 7 сакавіка, курс беларускага рубля да долара ЗША падымаўся да гістарычнага максімуму ў USD/BYN 3,3005. Пратрымаўся курс пары на максімумах адносна нядоўга, каля двух тыдняў, і ўжо да канца красавіка вярнуўся да сярэдняга курсу таго перыяду каля USD/BYN 2,5600.

Па выніках мінулага тыдня курс валютнай пары USD/BYN дасягнуў гадавога максімуму ў 3,1159, і да пачатку года рост пары складае ўжо +13,87%. Наш папярэдні прагноз не толькі цалкам рэалізаваўся, але і перавысіў чаканыя лічбы.

Курс еўра прайшоў той жа шлях, і на валютных таргах мінулага тыдня пара EUR/BYN падымалася да 3,3756. З пачатку гэтага года курс еўра расце ўжо на +16,11%.

Курс расійскага рубля таксама знізіўся да гадавога мінімуму і на апошніх таргах мінулага тыдня зафіксаваны на адзнацы RUB/BYN 3,2888 за 100 расійскіх рублёў. З пачатку 2023 года зніжэнне курсу расійскага рубля складваецца ўжо на ўзроўні мінус 13,08%.

«Жнівеньскі праклён» расійскага рубля

Прыкладна такая ж карціна назіралася ў мінулую пятніцу на валютных таргах Маскоўскай біржы, дзе курс долара ў моманце падымаўся да USD/RUB 96,128. Некаторыя аналітыкі ў сувязі з гэтым успомнілі пра «жнівеньскі праклён» расійскага рубля, калі ў апошнім летнім месяцы курс долара пачынае рэзка расці. Сапраўды, такая карціна назіраецца з пэўным пастаянствам, але звязваць гэта з нейкімі тагасветнымі фактарамі мы не станем.

Курс расійскага рубля знаходзіцца пад ціскам на працягу ўсяго 2023 года, і ў большай ступені гэта можа быць выклікана хранічным дэфіцытам дзяржаўнага бюджэту РФ.

Асабліва ярка гэта выявілася ў лютым-сакавіку гэтага года, і з тых часоў карціна практычна не мяняецца. Акрамя таго, да бягучага моманту дадаўся павышаны попыт на замежную валюту з прычыны знешнегандлёвага дысбалансу. Паступленне валюты на ўнутраны рынак не павялічваецца, а патрэба ў ёй з-за росту імпарту расце.

Плюс да ўсяго на працягу 2023 года цана на нафту маркі «Urals» была на досыць нізкім узроўні, што таксама магло адбіцца на зніжэнні прапановы валюты на рынку. Цяпер кошт «чорнага золата» расце, але эфект ад гэтага выявіцца прыкладна праз месяц.

Калі лясне беларускі рубель? Залежыць ад «старэйшага саюзніка»

100 расійскіх рублёў за долар? Цалкам рэальна

Сукупнасць гэтых фактараў працягвае захоўвацца, а такім чынам, курс расійскага рубля мае ўсе шанцы да далейшага паслаблення. Расійскія эканамісты з асцярожнасцю называюць лічбу ў 100 рублёў за долар, таму што псіхалагічна гэта гучыць некамфортна. Але рэальнасць такая, што пачуцці яна не шкадуе, і не выключана, што да канца жніўня, а можа і раней, расійскім спажыўцам прыйдзецца прывыкаць да новых курсаў.

На пазабіржавым рынку Форэкс усё ідзе сваім парадкам. Пара EUR/USD, адштурхнуўшыся ад лакальнага мінімуму ў EUR/USD 1,0918, да заканчэння мінулага тыдня вярнулася да росту, і курс закрыцця зафіксаваны на EUR/USD 1,1035.

Прычынай такога бадзёрага настрою еўра стала статыстыка рынку працоўнай сілы ў Штатах. Колькасць зноў створаных працоўных месцаў у ліпені 2023 года скарацілася, што прывяло да росту пары EUR/USD. Цалкам дапушчальна, што гэты фактар падтрымкі росту еўра будзе дзейнічаць на працягу гэтага тыдня і можна чакаць вяртання EUR/USD да адзнакі ў 1,1100.