«Чым менш у краіне эканомікі, тым больш у ёй штабоў»

Тэлеграм-канал «Лісты да дачкі» ва ўласцівай яму эпісталярна-іранічнай манеры разважае пра тое, як беларускі ўрад адказвае на заходнія санкцыі. І прыходзіць да высновы, што гэты адказ — у стылі беларускай улады.

Усё ж такі беларуская эканоміка стала вельмі раптоўная і супярэчлівая. То санкцыі ёй шкодныя, то санкцый у арганізме не хапае. Не ўсочыш ж за ўсімі гэтымі зменамі настрояў, шчыра кажу. Учора вось зноў былі шкодныя, але зусім крышачку не хапала.

Віцэ-прэм'ер Снапкоў сказаў, што з-за санкцый і вайны ва Украіне беларускі экспарт недалічыцца 14 мільярдаў долараў. Нават беларускаму ўраду, пры ўсім ягоным казённым аптымізме, цяжка не заўважыць гэтую страту. Таму што ўвесь беларускі ВУП — 70 мільярдаў. У сэнсе быў 70 мільярдаў. Больш не будзе.

За красавік ВУП асеў на 6 адсоткаў, прамысловасць на 10,6, а складскія запасы выраслі на 35,9 да пачатку года. І гэта, вядома, не мяжа, а толькі яе далёкія подступы. Таму што нават не ўсе санкцыі паспелі ўступіць у сілу. З чэрвеня еўрапейскі рынак зачыніцца для беларускай драўніны, шын, металаў і цэменту. А на падыходзе шосты пакет і некаторыя злыя людзі пачынаюць думаць пра сёмы.

Але ўрад, вядома, не дрэмле. Няма калі ўраду драмаць, калі вакол адкрываецца такое поле для дзейнасці. Снапкоў учора сказаў, што на тры каналы ўплыву санкцый яны адказалі чатырма прыярытэтамі ад штабоў трох узроўняў складанасці, якія працуюць 24/7 па схеме 48*48. Нават і не пытай мяне, што гэта азначае. Не з нашым маглоўскім розумам спасцігнуць усю веліч гэтай задумы. Але прыгожа ж. Выразна і сістэмна. Чым менш у краіне эканомікі, тым больш у ёй штабоў.

На недружалюбныя меры асобных нядобрасумленных партнёраў гэтыя штабы ўжо далі адказ: замарозілі стаўку арэнднай платы, дазволілі атрымліваць больш пасылак з-за мяжы і паабяцалі пра адмену залішніх адміністрацыйных працэдур. Ну а што? Працэдур у краіне шмат, можна і адмяніць. Яшчэ склалі пералік паралельнага імпарту і спісы для альтэрнатыўнага экспарту.

З абяцаннем «з прычыны асабліва надзвычайных абставінаў» кашмарыць бізнес менш звычайнага трохі, праўда, не задалося. У банках не кашмарыць не задалося, і ў медыцынскіх цэнтрах не атрымалася. Ну на самай справе, як ты яго будзеш менш кашмарыць, калі ў яго грошы ёсць, а іх самім не хапае? Ураду ж грошы больш патрэбныя. У яго ж і штабы, і пералікі, і скарачэнне адміністрацыйных працэдур для паляпшэння ўмоў вядзення бізнесу. А бізнес усё роўна выдаткуе гэтыя грошы на якое-небудзь глупства, якая не мае ніякага адміністрацыйнага сэнсу.