У судзе расійскі афіцэр заявіў, што ваяваў «у сумежнай краіне»

У Расіі ў судзе расійскі афіцэр Алег Лявонцьеў заявіў, што ўдзельнічаў у баявых дзеяннях на тэрыторыі суседняй краіны, дзе расійскіх вайскоўцаў «нібыта не было», і, як паведамляюць расійскія СМІ, магчыма, гаворка ідзе пра Украіну. Ён не назваў месца дакладна, піша «Радыё Свабода».

У ходзе пасяджэння Лявонцьеў, які абвінавачваецца ў датычнасці да гібелі салдата тэрміновай службы, папрасіў суд вынесці «станоўчае рашэнне», каб працягнуць службу і адправіцца ў Сірыю.

«Гэта дазволіць прынесці нейкую карысць дзяржаве. Я ўжо ўдзельнічаў у адным з такіх мерапрыемстваў, але, адзінае, гэта было на тэрыторыі сумежнай краіны, на якой нас нібы не было», — працытаваў у сераду, 4 ліпеня, словы Лявонцьева фонд «Права маці», які прадстаўляе інтарэсы сям’і загінулага.

У фондзе адзначаюць, што гэта, верагодна, першая афіцыйная заява расійскага вайскоўца пра такі ўдзел у баявых дзеяннях; расійскія СМІ, якія цытуюць заяву фонду, робяць уласную выснову, што гаворка ідзе пра ўдзел у баявых дзеяннях на тэрыторыі менавіта Украіны.

Пацверджанняў гэтых слоў з іншых крыніц пакуль няма, усе СМІ спасылаюцца на заяву згаданага расійскага фонду.

З 2014 года, пасля расійскай анексіі Крыму, на частцы Данбасу працягваецца ўзброены канфлікт, выкліканы гібрыднай агрэсіяй Расіі. Украіна і Захад абвінавачваюць Расію ў падтрымцы баевікоў — і ўзбраеннямі, і жывой сілай. Спачатку Масква цалкам адпрэчвала заявы пра тое, што расійскія грамадзяне ўдзельнічаюць у канфлікце на Данбасе, пасля заявіла, што там могуць знаходзіцца толькі расійскія «добраахвотнікі», якія не належаць да Узброеных сіл і іншых сілавых фармаванняў Расіі. Пра затрыманых на лініі фронту на ўсходзе Украіны расійскіх вайскоўцаў у Маскве сцвярджалі, што тыя звольніліся з войска якраз перад паездкай на Данбас.             

Па звестках ААН, за час канфлікту ў рэгіёне загінула больш за 10 тысяч чалавек.