Расія. «Яндекс.Новости» задумаўся пра закрыццё з-за ціску дэпутатаў

Кампанія «Яндэкс» разглядае магчымасць закрыцця сэрвісу «Яндекс.Новости», калі будуць ўведзеныя новыя правілы ў дачыненні да навінавых агрэгатараў.

Раней дэпутаты Дзярждумы абвінавацілі сэрвіс «Яндекс.Новости» ў нагнятанні сацыяльна-палітычнага становішча.

Як паведаміла выданню  «Коммерсантъ» крыніца, знаёмая з сітуацыяй, цяпер у «Яндэксе» разглядаюць розныя варыянты лёсу сэрвісу ў выпадку ўзмацнення жорсткасці рэгулявання, у тым ліку поўнае яго закрыццё.

У прэс-службе кампаніі падкрэслілі, што лічаць цяперашняе заканадаўства дастатковым для рэгулявання навінавых агрэгатараў. «Калі ад канала дастаўкі патрабуюць функцыі праверкі, рэдагавання і абвяржэння кантэнту — ён перастае быць каналам дастаўкі», — падкрэслілі ў «Яндэксе».

Пры гэтым у прэс-службе «Яндэкса» адмовіліся пракаментаваць інфармацыю пра магчымае закрыццё сэрвісу.

«Яндэкс» выказаў сваю пазіцыю ў адказ на прэтэнзіі дэпутата Дзярждумы, першага намесніка кіраўніка фракцыі «Адзіная Расія» Андрэя Ісаева. Ён дапусціў, што пошукавыя сістэмы «спецыяльна нагнятаюць сацыяльна-палітычную сітуацыю» тым, што пакідаюць у навінавых топах загалоўкі з «фэйкавай інфармацыяй».

Пазней дэпутат ад «Адзінай Расіі», чалец камітэта па бяспецы і супрацьдзеянні карупцыі Дзярждумы РФ Адальбі Шхагошаў прапанаваў гендырэктару расійскага «Яндэкса» Алене Бунінай перагледзець алгарытм падбору навін у агрэгатар кампаніі.

Са студзеня 2017 года ў Расіі дзейнічае закон, які рэгулюе працу навінавых агрэгатараў. Буйныя навінавыя інтэрнэт-агрэгатары былі прыроўненыя да СМІ. Сэрвісы з мільёнам карыстальнікаў у суткі абавязаныя правяраць дакладнасць інфармацыі, якую яны публікуюць, і выдаляць недакладныя дадзеныя па патрабаванні Роскамнагляду.

Таксама агрэгатары навінаў абавязаны захоўваць інфармацыю, якую яны распаўсюджваюць, звесткі аб крыніцы яе атрымання і тэрмінах распаўсюджвання на працягу паўгода. У Роскамнаглядзу павінен быць доступ да ўсіх гэтых дадзеных.