Новым прэзідэнтам Грузіі стаў былы футбаліст без вышэйшай адукацыі
У парламенце Грузіі 14 снежня завяршыліся прэзідэнцкія выбары. Новым прэзідэнтам краіны стаў Міхаіл Кавелашвілі. Яго абралі на безальтэрнатыўнай аснове.
Фота newsgeorgia.ge
Упершыню ў Грузіі выбіралі прэзідэнта не прамым усенародным галасаваннем, а праз выбаршчыкаў. Калегія складаецца з 150 дэпутатаў парламента Грузіі, 21 дэпутата Вярхоўнага савета Аджарыі, 20 прадстаўнікоў Вярхоўнага савета Абхазіі і 109 дэпутатаў раённых сакрэбула (гарсаветаў).
Адзіным кандыдатам у прэзідэнты з'яўляўся Міхаіл Кавелашвілі, вылучэнец ад кіруючай партыі «Грузінская мара», экс-дэпутат парламента, у мінулым футбаліст. Ён цалкам лаяльны да кіруючай у краіне групоўкі на чале з прарасійскім алігархам Бідзінам Іванішвілі.
Каб перамагчы Кавелашвілі неабходна было атрымаць 2/3 галасоў поўнага складу калегіі, 200 галасоў.У выніку за яго прагаласалі 224 чалавекі.
Выбары праходзілі на фоне пратэстнай акцыі на праспекце Руставелі ў Тбілісі і пры ўзмоцненых мерах бяспекі. Апазіцыя, якая байкатуе працу парламента, у працэсе не ўдзельнічала. Апаненты ўладаў лічаць, што працэдура нелегітымная, паколькі парламенцкія выбары былі сфальсіфікаваныя. Яны патрабуюць новых парламенцкіх выбараў.
Шостага прэзідэнта Грузіі абралі на пяць гадоў. Інаўгурацыя запланаваная на 29 снежня.
Глядзіце таксама
53-гадовы Міхаіл Кавелашвілі — чэмпіён Расіі і шасціразовы чэмпіён Грузіі па футболе, гуляў таксама ў Англіі і Швейцарыі, выступаў за зборную Грузіі.
Пры гэтым у яго няма вышэйшай адукацыі, праз што ў свій час ён не змог балатавацца на пасаду кіраўніка Грузінскай федэрацыі футбола. «Пакажы дыплом Кавелашвілі» — адзін са слоганаў грузінскіх пратэстаў.
Кавелашвілі вядомы сваёй антызаходняй рыторыкай, ён таксама выступае супраць» прапаганды " ЛГБТ.
Дзейны прэзідэнт — Саламе Зурабішвілі — падтрымлівае рух за перамены ў Грузіі. Яна ўдзельнічае ў акцыях пратэсту. Зурабішвілі раней заявіла, што не будзе складаць прэзідэнцкія паўнамоцтвы, бо яе пераемнік Кавелашвілі не мае легітымнасці, бо вылучаны і абраны нелегітымным парламентам. Лічыцца, што менавіта праз тое, што Зурабішвілі сышла ў апазіцыю, кіруючая партыя «Грузінская мара» вырашыла адмовіцца ад усенародных выбараў прэзідэнта, а прыняла працэдуру, якая выключае з’яўленне на гэтай пасадзе нелаяльнага чалавека. Пры гэтым Грузія з’яўляецца парламенцкай рэспублікай, паўнамоцтвы прэзідэнта там збольшага цэрэманіяльныя.
Апазіцыя анансавала чарговую акцыю пратэста менавіта 14 снежня, яе загадзя прымеркавалі да выбараў новага прэзідэнта.