Украінскія і расійскія футбалісты пабіліся ў турэцкім гатэлі

Масавая бойка паміж футбалістамі расійскага «Шынніка» і ўкраінскага «Міная» адбылася ў турэцкім гатэлі. У Турцыі каманды праводзяць трэніровачныя зборы.

Як паведамляе тэлеграм-канал «Baza», у гатэлі «Royal Seginus», размешчаным у Анталлі, адбылася масавая бойка паміж футбалістамі яраслаўскага «Шынніка» і «Міная» з Ужгарадскага раёна.

Сцвярджаецца, што канфлікт пачаўся ўвечары 13 лютага, калі некалькі прадстаўнікоў «Міная» падышлі да кіраўніка яраслаўскага клуба і запатрабавалі ад яго праспяваць украінскі гімн. Той прапанаваў украінцам разабрацца на вуліцы, аднак супрацоўнікам гатэля ўдалося ўладзіць канфлікт.

Праз некаторы час некалькі гульцоў украінскага клуба збілі футбаліста «Шынніка» ў ліфце. Калі ліфт прыехаў на паверх, яго сустрэла група футбалістаў расійскай каманды, і паміж гульцамі ўспыхнула масавая бойка. У гатэль прыйшлося выклікаць паліцыю і хуткую дапамогу.

Украінскі журналіст Міхаіл Співакоўскі ў праграме «ТаТоТаке» пацвердзіў факт бойкі, але пры гэтым заявіў, што канфлікт узнік не праз патрабаванне выканаць гімн Украіны, адзначае Sports.ru.

Паводле даных украінскага ютуб-канала «Бамбардзір», «Мінай» патрабаваў не сяліць каманду ў адным гатэлі з расійскімі клубамі, аднак з-за землятрусу ў Турцыі паўсталі праблемы з гасцініцамі. У выніку «Шыннік» засяліўся ў той жа гатэль, дзе пражывалі гульцы «Міная».

У Мінску на баскетбольным турніры трэнер быў у майцы з літарай Z

Украінская крыніца адзначае, што прычынай канфлікту стала бытавая сітуацыя: расійскі гулец нібыта быў п'яны і хаміў персаналу гатэля, яму зрабіў заўвагу футбаліст «Міная», пасля чаго яны пабіліся. Затым гулец «Шынніка» прывёў аднаклубнікаў, з-за чаго ўсчалася яшчэ адна бойка.

Зараз у гатэлі дзяжураць двое супрацоўнікаў паліцыі і дадатковыя нарады аховы. Адзначаецца, што паміж футбалістамі і прадстаўнікамі камандаў дагэтуль адбываюцца адзінкавыя сутычкі. У самім гатэлі пацвердзілі інфармацыю аб бойцы.

У «Шынніку» заявілі, што правядуць расследаванне гэтай сітуацыі.

«Мы цяпер праводзім расследаванне, высвятляем абставіны здарэння», — сказаў генеральны дырэктар клуба Сяргей Кулакоў.