У Гродне забаранілі легальны канцэрт амерыканскіх панкаў

Культура

Папярэдні дазвол на правядзенне канцэрту амерыканскага гурта ODIO, атрыманы два месяцы таму, адмянілі ў дзень мерапрыемства — ранкам 21 чэрвеня. Загад пра забарону мерапрыемства надыйшоў з Галоўнага ўпраўлення ідэалагічнай працы аблвыканкама, піша Hrodna.life.

Гурт ODIO

Гурт ODIO


Музыкі гурта ODIO вельмі чакалі паездкі ў Беларусі і былі шакаваныя адменай легальнага канцэрту. Блізкія да афіцыйных арганізатараў асобы лічаць, што гэта паказвае стаўленне дзяржавы да замежнікаў і не спрыяе паляпшэнню іміджа нашай краіны ў свеце. Не радыя і патэнцыйныя наведнікі, бо амерыканскія гурты прыязджаюць у Беларусь рэдка.

Ігар Банцар, лідар гурта «Mister X» і дырэктар «Гродзенскага рок-клуба», кажа, што ў яго практыцы гэта першы выпадак, калі легальны канцэрт, арганізаваны праз дзяржаўную ўстанову — Гродзенскі гарадскі цэнтр культуры — загадваюць адмяніць беспрычынна:

Dziеciuki граюць на байк-фэсце, «Ляпіс-98» прыязджае на SunDay, а ў Гродне ўлады лічаць, што маюць права дазваляць ці забараняць канцэрт невядома на якой падставе. Я занепакоены гэтай сітуацыяй, бо калі можна адмяніць легальны канцэрт, то што казаць пра нелегальныя і паўлегальныя?

Ігар Банцар

Ігар Банцар

Тым не менш, Банцар не здзіўлены сітуацыяй.

Рок-музыка —– гэта ад самага пачатку музыка пратэсту. Нягледзячы на мэйнстрым і «рокапопс», на тое, што рок-н-рол увайшоў у наша жыццё і стаў папсовым, улады разумеюць, што пратэстныя настроі могуць кімсьці накіроўвацца. У року шмат пратэстных выказванняў, антысістэмных, антыдзяржаўных. Яны ўспрымаюць рок-н-рол як рэальную пагрозу.

Гэта ўжо далёка не першы выпадак забароны гродзенскімі ідэолагамі культурніцкіх мерапрыемстваў. Раней чыноўнікі ўжо зрывалі прэзентацыю «Мовы» Марціновіча, канцэрты Дзянісава ды Памідорава і нават кінафестывалі. Гродзенцы нават склалі шот-ліст забароненых культурніцкіх імпрэзаў у сваім горадзе.


Паводле Hrodna.life