Ілля Міронаў: «Палітычных» за кратамі дагэтуль шмат, пачуў пра 72 справы за студзень — люты

Валанцёр Ілля Міронаў выйшаў на волю і распавёў выданню «Штодзень» пра дэталі свайго арышту. Яго пакаралі 13 суткамі за нібыта падпіскі на экстрэмісцкія рэсурсы. Па назіраннях Іллі, колькасць затрыманых паводле палітычных матываў не змяншаецца.

— Як лічыш, за што цябе насамрэч затрымалі?

— За тое, што я актыўна пішу скаргі. Я скардзіўся ў Міністэрства інфармацыі на праўладны тг-канал «Жёлтые сливы». Я падаваў заяву ў Следчы камітэт з просьбай адкрыць крымінальную справу ў дачыненні да адыёзнага прапагандыста Рыгора Азаронка. Мяркую, мне вырашылі даць 13 сутак у сувязі з маёй актыўнай грамадскай дзейнасцю.

— Як адбылося тваё затрыманне?

— 2 сакавіка да мяне ў кватэру прыйшлі два сілавікі. Маці адкрыла дзверы. Яны сказалі, што хацелі б адвезці мяне ў Савецкі РАУС. Я і маці паехалі з імі. У Савецкім РАУСе мяне пачалі распытваць, чаму я пішу ў інтэрнэце, што не атрымаў копіі пратакола, калі я атрымаў і распісаўся нават за гэта. Я адказаў, што копіі, насамрэч, не атрымаў, хоць і распісаўся за гэта. Пасля мне паказалі нейкі дакумент ад ГУБАЗ ад 22 лютага, дзе было напісана, што ў ходзе праверкі маёй старонкі выяўлены матэрыял з лагатыпам «Л*стэрка» і многа бела-чырвона-белай сімволікі.

І там было прыпісана яшчэ, што сімволіка бэчэбэ, паводле меркавання ГУБАЗ, прыраўноўваецца да артыкула 24,23 КаАП РБ («Парушэнне парадку арганізацыі ці правядзення масавага мерапрыемства»).

Таксама мяне абвінавачвалі, што я ставіў лайкі пад матэрыяламі «Б*лсата» і «Р*дыё Свабода». На што я ім сказаў, што гэта лухта, бо артыкулаў «Л*стэрка» я не размяшчаў і лайкаў не ставіў. Віны я сваёй не прызнаў. Па выніку я да самага вечара сядзеў у гэтым каменным мяшку. Увечары прывялі хлопцаў, якіх затрымалі за нібыта датычнасць да ПВК «Родан».

— Распавядзі падрабязней пра затрыманых па справе ПВК «Родан».

— Прывялі 29 чалавек. Але яны казалі, што не маюць ніякага дачынення да гэтага руху: хтосьці з іх проста ў бары побач сядзеў, хтосьці кеды прыйшоў набываць, хтосьці проста ішоў побач. Усіх малалетніх адпусцілі, а ўсіх, старэйшы за 17, затрымалі.

Валанцёр Ілля Міронаў хадайнічае аб адкрыцці крымінальнай справы на начальніка гомельскага ІЧУ

— Як прайшлі суткі ў ІЧУ гэтым разам?

— Так, як і раней. Першыя суткі сядзеў разам з алкаголікамі. Нас у двухмеснай камеры было чацвёра. Перадачы мне маці не змагла перадаць. Ёй нават сказалі, што можна скардзіцца на самым вышэйшым узроўні, аднак перадаваць нічога не будуць. Камеры былі поўныя. Як звычайна, у камерах быў скразняк.

А ежа была яшчэ горшай, чым летась. Узялі і вельмі моцна разбавілі кашу вадой, прычым, як мы зразумелі, вада нават не гатаваная была. 

Кожны дзень нам змянялі камеру. І ўсе, хто быў у гэтыя дні ў ІЧУ па палітыцы, сядзелі паводле артыкула 19,11 ч. 2 («Распаўсюджванне інфармацыйнай прадукцыі, уключанай у рэспубліканскі спіс экстрэмісцкіх матэрыялаў»). А менавіта за падпіскі на розныя рэсурсы за 2020-2021 гады.

— То-бок палітычных у ІЧУ вельмі шмат?

— Не ведаю, на ўзроўні чутак гэта ці не, але калі я быў у Савецкім РАУСе, то краем вуха пачуў пра 72 справы за студзень — люты. То-бок палітычных вельмі шмат. Іх было шмат і ў канцы 2022 года, і цяпер.