Хронікі рэпрэсій. Пачалі судзіць спявачку, якая адмовілася ад стыпендыі Лукашэнкі

З дапамогай інфармацыі праваабаронцаў сабралі звесткі пра палітычны пераслед у Беларусі за 1 жніўня.

Жыхара Жлобіна палітзняволенага Дзяніса Гузава асудзілі на два гады «хіміі» за ўдзел у акцыі пратэсту ў 2020 годзе. Яго абвінавацілі паводле ч.1 арт. 342 Крымінальнага кодэкса за арганізацыю і падрыхтоўку дзеянняў, якія груба парушылі грамадскі парадак, альбо актыўны ўдзел у іх. Справу разглядала суддзя Святлана Рубахава.

Паводле абвінавачання, Гузаў у ноч на 10 жніўня 2020 года «разам з іншымі асобамі актыўна парушаў грамадскі парадак, непадпарадкоўваўся патрабаванням супрацоўнікаў міліцыі, выходзіў на праезную частку вуліц, замінаў працы грамадскага транспарту».

Судовы працэс праходзіў яшчэ 27 красавіка.

У судзе Цэнтральнага раёна Мінска пачалі судзіць спявачку Патрыцыю Свіціну. Яе абвінавачваюць паводле «народнага» артыкула 342 КК. Справу разглядае суддзя Вікторыя Шабуня.

Відэа з дзяўчынай з'явілася 18 траўня. На ім дзяўчына расказвала, што «ўдзельнічала ў пратэстах», «выходзіла на дарогі» і ў складзе калоны «перакрывала рух транспарту». Таксама яна казала, што публікавала ў сацсетках «негатыўныя паведамленні» пра сілавікоў, аб «спецаперацыі, якая праводзіцца на тэрыторыі Украіны» і «распальвала варожасць і нянавісць паміж славянскімі народамі».

Патрыцыя — спявачка, якая з'яўлялася лаўрэаткай стыпендыі Лукашэнкі па падтрымцы таленавітай моладзі, але адмовілася ад яе.

У Мінскім гарадскім судзе пачаўся суд над Ірынай Скроб. Яе абвінавачваюць паводле ч.1 арт. 361-4 КК («Садзейнічанне экстрэмісцкай дзейнасці»). Справу будзе разглядаць суддзя Любоў Сімахіна. Падрабязнасці справы праваабаронцам невядомыя.

Праваабаронцы падлічылі, што паводле гэтага артыкула з чэрвеня 2022 года ў Беларусі асудзілі не менш за 65 чалавек на тэрміны ад двух і больш гадоў калоніі.

Яшчэ аднаго беларуса затрымалі пасля вяртання з-за мяжы. Мужчыну завуць Вячаслаў Чарнецкі. Яго абвінавачваюць у тым, што ён нібыта напісаў каля 1000 каментароў у «экстрэмісцкіх» каналах і чатах.

У Мінску затрымалі ўладальніцу бара «Пересмешник» і яе мужа. Праўладныя тэлеграм-каналы паведамляюць, што муж уладальніцы бара — грамадзянін РФ — удзельнічаў у акцыях пратэсту ў 2020 годзе, сігналіў машынай у знак салідарнасці з пратэстоўцамі, а дома захоўваў чатыры БЧБ-сцягі. Уладальніцу ж бара ГУБАЗіК абвінаваціў у «занятку прастытуцыяй».

Лукашысты заявілі аб затрыманні яшчэ аднаго чалавека з фільма DELFI. Прозвіша мужчыны невядомае.

Былога дырэктара магілёўскага музея Аляксея Бацюкова вызвалілі пасля трох сутак за кратамі. Падрабязнасцей няма. Вядома толькі, што ў пятніцу, 28 ліпеня, Бацюкова затрымалі раніцай, пасля чаго адправілі ў ІЧУ. Там ён прабыў трое сутак, пасля чаго выйшаў на волю.

Раней Аляксея Бацюкова затрымлівалі ў 2020 годзе за «ўдзел у несанкцыянаваным масавым мерапрыемстве». Тады суд прызначыў яму штраф.

У студзені 2021 года з Аляксеем, які на той момант займаў пасаду дырэктара Музея гісторыі Магілёва, не працягнулі кантракт.

Чарговае папаўненне «экстрэмісцкіх» матэрыялаў — суд Чыгуначнага раёна Гомеля за адно пасяджэнне прызнаў «экстрэмісцкімі» 25 інтэрнэт-старонак.

Гэта старонкі, звязаныя з праектамі «Рабочы Рух» і «Prague Support Team», а таксама заводамі БМЗ і «Гродна Азот». Нагадаем, што на пачатку ліпеня гэты ж суд за адно пасяджэнне прызнаў «экстрэмісцкімі» ажно 105 старонак.

Таксама «экстрэмісцкі» спіс папоўнілі відэа «Запад показал зубы режиму Александра Лукашенко. Отступает ли белорусский диктатор в гибридной войне?», старонкі ў «Аднакласніках» «Хватит Бояться!» і «Жыве Беларусь», а таксама тэлеграм-каналы і чаты «Іра Лукашэнка – прозвішча не прысуд», «Беглый в Украину UA», «Беларусы Одессы», «Razam – Новостной Канал», «PLACOÜKA», «Доўгая Дарога Дадому», «Беларускi дзённiк».