«Выдаў 800 рублёў купюрамі па 5 і 10». Мінчукі паведамляюць пра складанасці з наяўнымі ў банкаматах

Мінчукі скардзяцца, што, пачынаючы з выхадных, у многіх узнікаюць праблемы са здыманнем беларускай валюты ў банкаматах розных банкаў. Яе то зусім няма, то буйныя сумы апарат выдае купюрамі наміналам 5 і 10 рублёў. FINANCE.TUT.BY спытаў у банках, ці ёсць нейкія праблемы з рублямі і ці ўсталёўвалі ў апошні час якія-небудзь новыя ліміты на іх зняцце.

«Банкамат "БелВЭБ" даў 800 рублёў пяцёркамі і дзясяткамі»

У рэдакцыю прыйшло каля 50 паведамленняў аб праблемах са зняццем рублёў у банкаматах розных банкаў. Першыя выпадкі узніклі яшчэ 10 красавіка.

— Хацеў зняць 800 рублёў у банкамаце банка «БелВЭБ» на вуліцы Маскоўскай у Мінску. Больш за 400 рублёў апарат выдаваць адмовіўся. Акрамя таго, ён выдаў мне ўсю суму купюрамі па 5 і 10 рублёў, — напісаў нам чытач. — Гэта наогул нармальна, што такую суму выдаюць дробяззю?

Аналагічная гісторыя са здыманнем рублёў у банкамаце гэтага банка адбылася яшчэ ў адной чытачкі.

— У нядзелю, 11 красавіка, здымала грошы ў ГЦ «Скала» — 400 беларускіх рублёў. У банкамаце «Тэхнабанка» грошай не было. А банкамат банка «БелВЭБ» даў пяцёркі і дзясяткі. Звычайна дробныя ў банкамаце рэдкасць, — адзначае дзяўчына.

У кантакт-цэнтры банка «БелВЭБ» сказалі, што ў іх няма інфармацыі, якімі купюрамі запраўленыя прылады. Чаму нельга за адзін раз зняць больш за 400 рублёў, не ўдакладнілі.

«У трэцім банкамаце "Белінвестбанка" грошы былі, але стаяў ліміт у 175 рублёў»

— Няма беларускіх грошай у банкаматах "Белінвестбанка" на праспекце Ракасоўскага, 2 і 62, — напісала нам чытачка 10 красавіка.

Не атрымалася там зняць грошы і 14 красавіка ўвечары.

Былі скаргі на банкаматы гэтага банка і ў іншых месцах. Паводле слоў мінчукоў, не аказалася наяўных у «Экспабеле», у банкамаце каля крамы «Камунарка» на праспекце Пераможцаў некалькі дзён запар, у Бараўлянах на Лясной, 19а.

— У панядзелак днём у двух банкаматах "Белінвестбанка" ва Уруччы рублёў не аказалася. У трэцім грошы былі, але стаяў ліміт у 175 рублёў. Выдаваў банкамат выключна пяцірублёвыя купюры. Да канца пятага зняцця ў мяне аказалася 213 купюр. Старыя, новыя, у нармальным стане, — распавёў наш чытач.

У гэты ж дзень рублёў не было і ў банкамаце на Прытыцкага.

Аператар у кантакт-цэнтры "Белінвестбанка" сказала, што перадасць інфармацыю пра банкаматы, у якіх не было грошай, у інкасацыйную службу. Таксама яна сказала, што ніякіх дадатковых лімітаў (як распавёў чытач, у 175 рублёў. — Заўв. рэд.) на зняцце рублёў банк не ўводзіў.

— Існуюць абмежаванні па выдачы грашовых сродкаў у банкаматах нашага банка па картках нашага і іншых банкаў за адну аперацыю: у залежнасці ад тэхнічных асаблівасцей банкамата — ад 20 да 30 купюр у нацыянальных банкнотах альбо замежнай валюце, а таксама пры зняцці з картак, эмітаваных іншымі банкамі (банкамі Беларусі і замежнымі банкамі), ёсць абмежаванні па суме за адну аперацыю 200 дол./ еўра — гэта з нашага боку. Таксама магчымая камісія з боку іншага банка, — растлумачылі ў кантакт-цэнтры.

«У банкаматах "Альфа-Банка" не было рублёў, зняла грошы толькі з шостай спробы»

На адсутнасць наяўных ў банкаматах у розных частках горада паскардзіліся і кліенты «Альфа-Банка».

— У сераду на Дзяржынскага не змагла зняць 200 рублёў, банкамат быў пусты. Прыйшлося ісці ў банкамат іншага банка, — распавядае мінчанка Аляксандра.

Яшчэ адна чытачка сказала, што за некалькі дзён зрабіла з паўдзесятка спроб зняць грошы ў банкаматах гэтага банка, атрымалася толькі на шосты раз.

— У мінулую пятніцу ў банкамаце «Альфа-Банка» ў «Кароне Замак» не было наяўных. У нядзелю і панядзелак у «Прасторы» на Дзяржынскага, 126 не было. Учора ўвечары ў «Кароне» на Дзянісаўскай, — пералічвае дзяўчына.

Таксама двое мінчан сказалі, што не аказалася грошай у банкамаце ў ГЦ «Арэна-Сіці».

Аператар кантакт-цэнтра банка патлумачыла, што ніякіх праблем з наяўнымі рублямі цяпер няма.

— Магчыма, знялі ўжо да гэтага часу ўсю наяўнасць. Інкасацыя праходзіць да абеду ў працоўныя дні, — сказала супрацоўніца банка.

На пытанне, ці магло такое быць, што знялі наяўнасць ва ўсіх пералічаных банкаматах за некалькі дзён, адказала, што «на жаль, і такое бывае».

«У банкамаце "Белгазпрамбанка" стаяла абмежаванне: — не больш за 25 рублёў за раз»

Таксама некалькі паведамленняў прыйшло аб адсутнасці рублёў у банкаматах «Прыёрбанка» і «БПС-Ашчадбанка».

Адна чытачка паведаміла, што спрабавала зняць наяўныя ў адным з банкаматаў «Белгазпрамбанка» з карты гэтага банка і ён адмовіўся выдаць патрэбную суму.

— Там стаяла абмежаванне: не больш за 25 рублёў за раз, — распавядае дзяўчына.

— Абмежаванні па зняцці сродкаў з нашых карт у нашых прыладах не ўстаноўленыя. Магчыма, праблема была ў самой прыладзе, — сказалі ў кантакт-цэнтры «Белгазпрамбанка».