Расія. Расстат зафіксаваў падзенне ВУП і даходаў насельніцтва

Даходы расіян і абарот рознічнага гандлю зноў пачалі зніжацца ў кастрычніку. У студзені-верасні 2016 года ВУП Расіі знізіўся на 0,7% у адносінах да гэтага ж перыяду 2015 года, паказалі дадзеныя Расстата.

Гэта супадае з ацэнкай Мінэканамразвіцця Расіі, паводле якой за першыя дзесяць месяцаў гэтага года ВУП упаў на 0,7%.

Мінэканамразвіцця чакае, што расійская эканоміка па выніках гэтага года скароціцца на 0,6%. Гэта адпавядае прагнозам іншых эканамістаў. Так, у Еўрапейскім банку рэканструкцыі і развіцця таксама чакаюць скарачэння ВУП на 0,6% у гэтым годзе, а ў МВФ — на 0,7%.

Расстат апублікаваў у пятніцу справаздачу аб сацыяльна-эканамічным становішчы Расіі ў студзені-кастрычніку гэтага года. Многія ключавыя паказчыкі расійскай эканомікі, паводле справаздачы, сур'ёзна пагоршыліся.

Падзенне рэальных даходаў у кастрычніку паскорылася да 5,9% у гадавым вымярэнні, хоць у верасні яны знізіліся ўсяго на 1,5%. Гэты паказчык адлюстроўвае тое, колькі ў насельніцтва застаецца грошай пасля выліку ўсіх абавязковых плацяжоў і карэкцыі на індэкс спажывецкіх цэн.

Гэта прывяло да скарачэння рознічнага гандлю, абарот якога ў кастрычніку ўпаў на 4,4%. У верасні падзенне складала ўсяго 3,6%.

У кастрычніку ўпершыню з сакавіка вырас узровень беспрацоўя: ён склаў 5,4% супраць 5,2% у верасні. Агульная колькасць беспрацоўных у Расіі склала 4 мільёны 103 тысячу чалавек.

Пагаршэнне сітуацыі ў эканоміцы раней паказалі апытанні. Расіяне зноў пачалі скардзіцца на пагаршэнне эканамічнага становішча, яны баяцца страціць працу і паведамляюць пра скарачэнне даходаў.

Паводле ВВС