«8 мая 1945 года было адказам на спробу анэксіі чужой тэрыторыі на падставе абароны нацменшасцяў»

Прэзідэнт Расіі Уладзімір Пуцін разбурыў усю архітэктуру бяспекі ў Еўропе і свеце, якая была пабудавана пасля Другой сусветнай вайны, з-за дробязі. Аб гэтым сказаў у інтэрв'ю нямецкаму выданню Die Welt прэзідэнт Эстоніі Томас Ільвес.



Паводле яго слоў, пагадненне аб асацыяцыі Украіны з Еўрасаюзам было зусім нязначным і не вельмі сур'ёзным крокам.
«Гэта крыху больш, чым абмен студэнтамі і свабодны гандаль. Праблем няма зусім. Але Пуцін крытыкуе ЕС за нібыта памылковую палітыку. Што трэба больш улічваць асцярогі Расіі. Я скажу вам нешта. 8 мая 1945 года было адказам на спробу анэксіі чужой тэрыторыі на падставе абароны нацменшасцяў», — нагадаў эстонскі прэзідэнт.
Пры гэтым ён адзначыў, што вайна на Усходзе Украіны і анэксія расійскай арміяй украінскага Крыму парушае статут ААН, Хельсінскі дагавор і Парыжскую хартыю. І, на думку Ільвеса, Крэмль ужо даўно не звяртае ўвагі на міжнароднае заканадаўства.
«Грузія толькі выказала жаданне ўступіць у НАТА ў 2008 годзе, а Расія развязала вайну. А гэта была яшчэ больш нікчэмная прычына, чым асацыяцыя з ЕС», — сказаў прэзідэнт Эстоніі.
Ён таксама дадаў, што Масква, мабыць, разлічвала, што дасягне сваёй мэты ва Украіне гэтак жа хутка, як падчас збройнага канфлікту з Грузіяй. Аднак на справе выйшла ўсё не так. Ён таксама заклікаў краіны Альянсу размясціць больш войскаў ля мяжы Расіі, паколькі базавая дамова «НАТА-Расія» больш не дзейнічае.
Паводле яго слоў, у 1997 годзе, калі на гэтым дакуменце свой подпіс паставіў прэзідэнт Барыс Ельцын, расійскія ваенныя самалёты не маглі падняцца ў паветра з-за недахопу ў Расіі грошай на паліва. А сёння яе знішчальнікі і бамбавікі пастаянна парушаюць паветраную прастору краін Балтыі. Фармулёўка ў дакуменце кажа, што «улічваючы цяперашнюю сітуацыю» ў балансе сілаў, НАТА не будзе размяшчаць войскі каля расійскіх межаў. Але сітуацыя ўжо зусім не такая, як у 1997 годзе.
Раней прэзідэнт Эстоніі Томас Ільвес казаў, што Захад дазволіў Расіі развязаць вайну ва Украіне. Паводле яго слоў, Крэмль неаднаразова заяўляў пра свае агрэсіўныя намеры і хапаўся за зброю для прасоўвання ўласных інтарэсаў у суседніх краінах. Але Еўрасаюз і ЗША ніяк на гэта не рэагавалі і дазволілі расійскаму боку паводзіць сябе агрэсіўна. Крэмль працягвае ладзіць правакацыі ў краінах Балтыі і, у прыватнасці, у Эстоніі. У мінулым годзе расійскія ваенныя перасеклі эстонскую мяжу і выкралі супрацоўніка спецслужбаў. А шпіёны Расіі ўварваліся ў памяшканне нямецкіх салдат у Эстоніі.
zn.ua