Вайна Расіі з Украінай, дзень 16. Асноўнае на гэты момант
Вайна, якой давалі максімум тры дні, цягнецца ўжо трэці тыдзень і з кожным днём прыносіць новыя ахвяры сярод вайскоўцаў і мірных украінцаў. Расказваем, што адбылося сёння, 11 сакавіка, па стане на 22:00.
Ваенны каля супрацьтанкавых вожыкаў у цэнтры Кіева. Фота УНІАН
1528 мірных жыхароў Марыўпаля былі забітыя расійскімі акупацыйнымі войскамі, паведамляе мясцовая гарадская рада.
***
Міхаіл Падаляк заявіў, што РФ наймае 16 тысяч былых байцоў ІДІЛ для вайны ва Украіне.
Паводле дарадцы кіраўніка ОП, «наём ІДІЛ і расійскія прапагандысцкія заявы пра хімічную зброю сведчаць аб намеры рэалізаваць ва Украіне сірыйскі сцэнар».
***
РФ плануюць абкружыць Адэсу з боку Мікалаеўскай вобласці і непрызнанага Прыднястроўя, паведамляе мэр Адэсы Труханаў.
***
У Мелітопалі акупанты выкралі мэра горада Івана Фёдарава.
«Падчас выкрадання яму апранулі пластыкавы пакет на галаву», паведамляе былы народны дэпутат Украіны Антон Герашчанка.
***
Міністр абароны Украіны Аляксей Рэзнікаў заявіў, што расійскія акупанты рыхтуюць правакацыю, каб прымусіць Беларусь ваяваць супраць Украіны.
Пазней камандаванне Паветраных сіл УСУ паведаміла, што правакацыя адбылася.
У сваю чаргу Мінабароны заявіла, што ракетны ўдар па беларускай вёсцы – фэйк.
***
Еўракамісія рыхтуе чацвёрты пакет антырасійскіх санкцый, паведамляе старшыня Еўракамісіі Урсула фон дэр Ляен.
Таксама яна паабяцала, што ў сярэдзіне траўня Еўракамісія прадставіць план адмовы ад расійскіх газу, нафты і вугалю да 2027 года.
***
Аляксей Навальны з калоніі заклікаў расійцаў выйсці ў гэтыя выходныя на пратэсты супраць уварвання Расіі ва Украіну.
«Вар'яцкага маньяка Пуціна хутчэй за ўсё спыніць зараз народ Расіі, калі выступіць супраць вайны», паведамляе ў сваім інстаграме палітык.
***
Кіраўнік МЗС Украіны Дзмітрый Кулеба паведамляе, што РФ рыхтуе яшчэ адну «жахлівую аперацыю».
«Маніякальная апантанасць, з якой расійскія чыноўнікі фантазіруюць аб неіснуючай біялагічнай або хімічнай зброі альбо пагрозах ва Украіне, выклікае глыбокую трывогу і можа на самой справе ўказваць на тое, што Расія рыхтуе яшчэ адну жудасную аперацыю пад ілжывым сцягам. Гэты твіт для пратакола», – паведамляе Дзмітры Кулеба.
У сваю чаргу прэзідэнт Украіны Уладзімір Зяленскізаявіў: «Я прэзідэнт адэкватнай краіны і адэкватнага народа. І бацька дваіх дзяцей. Ніякай хімічнай ці любой іншай зброі масавай паразы на маёй зямлі не распрацоўвалі. Увесь свет гэта ведае. І калі Расія зробіць нешта падобнае супраць нас – атрымае жорсткі санкцыйны адказ».
***
Улады Беларусі дазволілі перасоўванне расійскіх ракет па сваёй чыгунцы, паведамляе Цэнтр супрацьдзеяння дэзінфармацыі пры СНБА Украіны.
У паведамленні таксама адзначаецца, што ўмовы перавозкі не адпавядаюць ніякім правілам бяспекі, што можа выклікаць выбухі са шматлікімі ахвярамі.
***
Мэр Марыўпаля Вадзім Бойчанка запісаў відэазварот пра катастрафічную сітуацыю ў горадзе. Паводле мэра, расійскія войскі абстрэльваюць жылыя масівы і не дазваляюць даставіць гуманітарную дапамогу.
«Яны цынічна трымаюць у палоне 400 тысяч марыўпальцаў, якія з надзеяй кожны дзень чакаюць гуманітарны калідор. А яны цынічна гавораць аб тым, што ён ёсць, «выязджайце!». І мы б'емся, прабіваемся, наторкваемся на міны, на танкі, трапляем пад «Грады». Але гуманітарны груз ужо 6 дзень не можа патрапіць у рэжыме аб'яўленай Расійскай Федэрацыяй «цішыні» да акупаванага горада. Гэта самы высокі ўзровень цынізму з боку Расіі. Яны вядуць знішчальную вайну», – заяўляе кіраўнік горада.
***
Пуцін на нарадзе Савета бяспекі абвесціў пра пачатак адпраўкі «добраахвотнікаў» на вайну супраць Украіны.
«Калі вы бачыце, што ёсць людзі, якія жадаюць на добраахвотнай аснове прыехаць і аказаць дапамогу людзям, якія жывуць на Данбасе, трэба пайсці ім насустрач і дапамагчы перабрацца ў зону баявых дзеянняў», – загадаў Пуцін кіраўніку Мінабароны РФ Шайгу.
***
«Расія не ў стане ўзяць гарады, украінскі супраціў вельмі моцны, таму яна робіць тое, што рабіла ў Сірыі ці Чачні – бамбіць», – заявіў кіраўнік дыпламатыі ЕС Жозэп Барэль.
«Руская армія – гэта артылерыйская армія. Таму яна бамбіць без разбору – то шпіталь, то тратуары, то дамы», – адзначыў ён.
Жозэп Барэль таксама падкрэсліў, што ёсць ужо шмат прычын для таго, каб судзіць Уладзіміра Пуціна ў Міжнародным крымінальным судзе ў Гаазе.
***
Падчас сустрэчы з Пуціным Лукашэнка заявіў, што Украіна «атакавала б Беларусь, калі б не прэвентыўны ўдар з боку Расіі».
***
Пуцін загадаў падрыхтаваць тэракт на Чарнобыльскай АЭС, паведамляе Hromadske са спасылкай на Галоўнае ўпраўленне разведкі Мінабароны Украіны.
Па дадзеных разведчыкаў, расійскія вайскоўцы плануюць стварыць тэхнагенную катастрофу, а адказнасць за яе паспрабуюць ускласці на Украіну, піша выданне.
***
Генпракуратура Расіі запатрабавала заблакаваць у краіне Instagram.
Таксама ведамства запатрабавала прызнаць кампанію Meta (ёй належаць Facebook, Instagram і WhatsApp) экстрэмісцкай арганізацыяй і забараніць яе дзейнасць у Расіі.