«Расія ў гэтай вайне прайграе, і ў яе не будзе магчымасці прымаць рашэнні па Беларусі»

Палітыка

Расійскі журналіст і палітолаг Майкл Накі, які жыве ў Літве, лічыць, што будучыня Беларусі надалей — у Еўропе, нягледзячы на тое, што з гэтай нагоды будзе думаць і гаварыць Расія.

img_3514_logo_1_1_1.jpg


— Я мяркую, што ў Беларусі ўсё ў будучыні будзе крыху прасцей, чым у Расіі, з адной відавочнай прычыны: Беларусь ясна дала зразумець, што яна незадаволеная дыктатурай у сваёй краіне, мы бачылі сотні тысяч людзей, — нагадаў Майкл Накі ў эфіры «Зв*чайнага ранку». — І гэта важна: Беларусь прадэманстравала, што большая частка людзей не згодна з дзеючым рэжымам і выступае супраць яго.

Цяпер многія спрачаюцца аб тым, у якім становішчы знаходзяцца грамадзяне Расіі: закладнікі, саўдзельнікі, яшчэ хтосьці.

І ў гэтым сэнсе паверыць, што ўсе расійцы радыкальна супраць Пуціна і проста баяцца, складаней, бо ў Беларусі мы бачылі гэтую гіганцкую хвалю (і гэта не перабольшанне), гэта значыць вельмі многія людзі, можна нават упэўнена сказаць большасць там — супраць Лукашэнкі і галасавалі за Ціханоўскую.

І яны выходзілі, і іх душылі. Лукашэнку давялося душыць людзей, а ў Расіі гэтага не было. Не, там выходзіла, вядома, і немалая колькасць, але непараўнальная ў маштабах, давайце шчыра, хутчэй у рамках статыстычнай хібнасці.

І таму ў сусветным успрыманні Беларусь і беларусы — гэта ўсё ж такі закладнікі Лукашэнкі. У адносінах да Расіі такога ўспрымання няма. І ў гэтым сэнсе зваротная інтэграцыя Беларусі ў сусветную супольнасць бачыцца мне значна прасцейшай.

Пры гэтым палітолаг лічыць, што і расійскае кіраўніцтва ў будучыні вымушана будзе змірыцца з еўрапейскім выбарам беларусаў.

— Да пачатку поўнамаштабнага ўварвання Уладзімір Пуцін быў актарам, які прымаў рашэнні, і многае залежала ад таго, што ён вырашыць.

Але з 2023 года, калі ў мяне пытаюцца, колькі Пуцін будзе працягваць гэтую вайну, я ўжо кажу, што гэта не залежыць ад Пуціна. Ён больш не чалавек, які прымае рашэнні. Ён чалавек, які рэагуе.

Таму захоча ён там утрымліваць ці не ўтрымліваць Беларусь, хто там плануе што з ёй рабіць — яны шмат на сябе бяруць.

Расія ў гэтай вайне з высокай верагоднасцю прайграе, і таму ў яе не будзе магчымасці прымаць рашэнні па Беларусі, тым больш што як мінімум фармальна Беларусь працягвае заставацца незалежнай краінай. Але нават фармальнай падставы для таго, каб нешта там рабіць з Беларуссю, у Расіі не будзе ў будучыні.

Беларусь — гэта незалежная краіна, шмат у чым праеўрапейская краіна, з людзьмі, якія паказалі, што яны незадаволеныя дыктатурай і спрабавалі з ёй змагацца.

У гэтым сэнсе Беларусь — не Расія, гэта дзве цалкам розныя дзяржавы, з двума рознымі шляхамі. І мне падаецца дзіўным успрымаць іх як адну краіну, асабліва цяпер, у кантэксце 2023 года.

Гэта дзіўна і з пункту гледжання маральнага і адэкватнага, і з пункту гледжання магчымасцей гэта зрабіць. Нават калі ў кагосьці будзе жаданне, думаю, магчымасцей у любым выпадку не будзе, — мяркуе Майкл Накі.