Адзін з мігрантаў на мяжы з Беларуссю напаў з нажом на польскага салдата

Адзін з мігрантаў, што спрабавалі незаконна перасекчы польска-беларускую мяжу, напаў на польскага салдата. Яго даставілі ў бальніцу.

Мігрант нібыта ўдарыў нажом польскага салдата, пра што паведаміў намеснік міністра ўнутраных спраў і адміністрацыі Чэслаў Мрочак у эфіры 1 канала Польскага радыё. Раненне аказалася сур'ёзным, але жыццю паляка нічога не пагражае.

«Сёння раніцай я атрымаў вельмі дрэнную інфармацыю, што адзін з салдатаў, які спрабаваў спыніць тых, хто перасякаў мяжу, атрымаў нажавое раненне. Міграцыйны ціск узмацняецца, узмацняецца агрэсія гэтых людзей. Яны спрабуюць фарсіраваць мяжу вялікімі групамі, якія фарміруюцца дзякуючы падтрымцы беларускіх службаў», — паведаміў Мрочак.

Ён адзначыў, што міністэрства прымае меры для абароны салдат, паліцэйскіх і памежнікаў. Паводле яго слоў, усе гэтыя фарміраванні выконваюць задачы ў галіне пагранічнай бяспекі і бяспекі Польшчы.

Хваля спробаў перасекчы мяжу

Паводле звестак Памежнай службы Польшчы, за апошнія тры дні больш за 630 чалавек спрабавалі незаконна перасекчы польска-беларускую мяжу. У пятніцу было 160 спробаў, у суботу — звыш 280, а ў нядзелю — 190. У ваколіцах Белавежы і Чарамхі мелі месца напады на польскія патрулі.

Паводле звестак Падляскага памежнага аддзялення, з пачатку года на ўчастку мяжы ў гэтым рэгіёне зафіксавана больш за 13 тысяч спробаў незаконнага перасячэння мяжы з Беларусі. За апошнія тры дні памежная служба і паліцыя затрымалі агулам 11 чалавек за дапамогу і падбухторванне да незаконнага перасячэння мяжы. Гэта шэсць грамадзян Украіны, два грамадзяніна Туркменістана і трое беларусаў, якія спрабавалі перавезці замежнікаў. Усяго З пачатку года затрымана 176 памагатых і арганізатараў незаконнага перасячэння мяжы.

Міграцыйны крызіс як інструмент вайны

Шлагбаўм на мяжы

На 186 км мяжы з Беларуссю ўстаноўлена сталёвая загарода вышынёй 5,5 м, пабудаваная ў 2022 годзе. Гэта галоўны элемент абароны гэтай мяжы ад нелегальнай міграцыі. Яго дапаўняе так званы электронны шлагбаўм — сістэма камер і датчыкаў, якая дзейнічае на 206 км.

Памежная ахова абрала і заключыла кантракт з падрадчыкам такой электроннай загароды таксама на рацэ Буг уздоўж мяжы з Беларуссю ў Люблінскім ваяводстве. Агароджы будуць пабудаваныя на 172 кіламетрах.

Электронны бар'ер таксама будзе пабудаваны на памежных рэках Свіслач і Крынічка. На ўчастку працягласцю каля 47 км будзе ўстаноўлена каля 500 слупоў з тысячай дзённых/начных і цеплавізійных камер, а таксама створаная сетка датчыкаў.