Ад «пракрамлёўскай мафіі» да «шалудзівага». Як Лукашэнка выказваўся аб сваіх апанентах на выбарах

Кіраўнік Беларусі славуты сваімі неардынарнымі выказваннямі. Шмат ягоных інтэрв’ю былі разабраныя на цытаты і пайшлі ў народ. Некаторыя можна назваць забаўнымі («Толькі ўзяўся за яйкі, як малако прапала»), але большасць з іх сапраўды абразлівыя. «Белсат» зрабіў падборку цытатаў Лукашэнкі, адрасаваных палітычным канкурэнтам на прэзідэнцкіх выбарах.

Кандыдаты на апошніх выбарах

Падчас наведвання Трактарнага заводу Аляксандр Лукашэнка выказаўся аб сваіх асноўных апанентах на гэтых выбарах. Віктару Бабарыку ён параіў падумаць, дзе працаваць пасля 9 жніўня, а Валеру Цапкалу прыгадаў аб колішнім звальненні. Больш за ўсіх дасталося блогеру Сяргею Ціханоўскаму, жонка якога вылучылася ў кандыдаты.
«Гэта, падаецца, незалежная газета ў Расеі [Камерсант — заўв. «Белсат»]. Але мы ведаем, хто яе фінансуе… Нібыта інтэрвʼю бярэ ў аднаго шалудзівага, інакш і не назавеш, які тут ходзіць, крычыць па Менску больш, ды і ў іншых гарадах».

Апазіцыя ў 2011 годзе – дрэнь і падонкі

Пасля падзеяў Плошчы-2010 Лукашэнка не саромеўся ў выразах. Вось так ён выказваўся аб кандыдатах у прэзідэнты ад апазіцыі:
«Скажу вам шчыра: я занадта самаўпэўнены і ганарлівы чалавек, я сабе не дазволю такімі метадамі глядзець на гэтую дрэнь».
«Я не бачу сапраўднай апазіцыі ў краіне».
«Хто павылазіў, Багданкевіч, Казулін… і іншыя, як Лябедзька, якога я па просьбе Раманчука выпусціў з турмы. А ён сёння вякае. Гэта ж падонкі. Вы хоць дзякуй скажыце, што прэзідэнт вас выпусціў з гэтай камеры».

Кампрамат і сувязі з Масквой

Знявага апанентаў даўно была ўлюблёнай тактыкай Лукашэнкі, вядомай ягоным палітычным супернікам яшчэ ў 90-ыя. Апроч гісторыі cа скрыняй цвікоў, Лукашэнка заявіў, што мае кампрамат на першага кіраўніка Беларусі — Станіслава Шушкевіча.
«Не я яму суддзя. Я ведаю вельмі шмат аб Шушкевічы, і дастаткова было аднаго факту, каб ён закрыўся на рэшту жыцця».
Даставалася ад Лукашэнкі і нават ідэалагічна блізкім да яго людзям. Напрыклад, Вячаславу Кебічу. Калісьці дзейны кіраўнік краіны абвінаваціў яго ў карупцыі і назваў «прамаскоўскай мафіяй».

Дрымучы сексізм

Не заўсёды ён выказваецца аб суперніках у грубай форме. Напрыклад, Таццяна Караткевіч заслужыла амаль што пахвалы. Падчас выбараў 2015 году Лукашэнка вось так адгукаўся аб ёй:
«Так, апазіцыянер, але не крычыць жа – на плошчу, ламаць, руйнаваць. Даволі нармальны і свядомы чалавек. У яе ёсць сваё разуменне – як у Алексіевіч».
Але жменю сексізму дакінуць не забыўся:
«Прэзідэнт у нашай краіне займаецца шматлікімі пытаннямі – ад бяспекі да эканомікі, якія чалавек у спадніцы пакуль што, напэўна, не зможа выконваць».
Сёлета Лукашэнка ізноў не забыў нагадаць, што жанчыне не месца ў палітыцы, прыгадваючы патэнцыйных кандыдатак у прэзідэнты: Святлану Ціханоўскую і Наталлю Кісель.
«У нас Канстытуцыя не пад жанчыну. І ў нас грамадства не саспела для таго, каб галасаваць за жанчыну. Таму што ў нас згодна з Канстытуцыяй прэзідэнт мае моцную ўладу», – сказаў Лукашэнка падчас наведвання МТЗ.

Адмарозкі ды дэбілы

Лукашэнка не цураўся і наўпроставых абразаў. Так, у 2006 годзе ён назваў экс-кандыдата ў прэзідэнты Аляксандра Мілінкевіча «дэбілам» і «падонкам».
«Я кажу – ганіце гэтага падонка, каб яму месца ў межах Беларусі не было. Мяне часта папракаюць: чаго вы дазваляеце ім гэта па тэлебачанні гаварыць? Радныя мае, каб я забараніў яму гаварыць на тэлебачанні, вы б не ведалі, што гэта за дэбіл. Вы паглядзіце на чалавека звонку – крыўлянні нейкія, навыкі пехацінца».
Не абышоў ён і іншых удзельнікаў выбарчай кампаніі 2006 года.
«Гэта не апазіцыя, гэта – адмарозкі. Які можа быць дыялог, калі яны [Лябедзька і Мілінкевіч] заклікаюць да ўвядзення эканамічных санкцыяў супраць беларускага народу?»

Статкевіч, які хоча быць у турме

У 2015, калі Мікалай Статкевіч яшчэ знаходзіўся ў турме, Лукашэнка сцвярджаў, што гэта яму ледзь невыгодна.
«Чацвёра не хацелі быць у турме. Яны не ў турме. Адзін, які сёння знаходзіцца там [Мікалай Статкевіч – belsat.eu], ён хоча быць вязням, і ён лічыць, што «вунь я буду вязнем, гэта зробіць мяне героем у Беларусі».
Сёлета Віктар Бабарыка падаў ў Цэнтрвыбаркам скаргу на выказванні Лукашэнкі. Магчыма зараз кіраўнік краіны будзе больш пільна сачыць за сваёю лексікаю.