«Не здолеў жыць без любові тых, хто яго прыручыў»

Памёр сабака, фотаздымкі якога на руінах знішчанага ракетай дома ў Дняпры сталі вядомыя ўсёй Украіне.

У Дняпры ракета расійскіх захопнікаў 29 верасня трапіла ў прыватны сектар, у выніку былі разбураныя 4 дамы і загінулі тры чалавекі. Раніцай наступнага дня сацсеткі абляцела фота сабакі, які сядзеў на руінах ушчэнт разбуранага ракетай дома і плакаў.

Далейшы лёс жывёлы занепакоіў жыхароў горада. Пра сабаку тады распавядалі многія ўкраінскія СМІ. Высветлілася, што гаспадары сабакі загінулі. Сабаку звалі Крым. У яго была кантузія, праблемы з сэрцам, а таксама жывёла была ў шоку.

У тую ноч ад расійскай ракеты Ха-22 загінула сям'я — мама з двума дзецьмі і бабуля. Застаўся 12-гадовы Крым, што ацалеў у двары разбуранага дома.

«Сабака знаходзіўся на месцы "прылёту" нават падчас працы ратавальнікаў. Ён сядзеў зверху руін і ні на крок не адыходзіў. Жывёла таксама была траўміраваная», — распавядалі ратавальнікі.

Пазней сабаку, які доўга скуголіў на руінах хаты і нікога да сябе не падпускаў, забрала зааслужба. У КП «Заакантроль» пра жывёлу клапаціліся спецыялісты. Сабака быў у вельмі цяжкім псіхалагічным стане. Спачатку ні на кога не рэагаваў, а потым паводзіў сябе агрэсіўна. І сабака на самай справе плакаў.

Кіраўніца аддзела рэгістрацыі жывёл КП «Заакантроль» Ірына Панамарэнка распавядала СМІ пра Крыма: «Сабакі плачуць, сабакі стрэсуюць, яны не ядуць па некалькі дзён. Сабакі ўсё разумеюць і вельмі перажываюць».

Цяпер стала вядома, што сабака Крым памёр, пра гэта паведамілі ў сацсетках:

«Памятаеце гэтага сабаку? Яго дом зруйнаваны, і яго гаспадары пад Дняпром загінулі ад ракетнага ўдару. І толькі ён, паранены, сядзеў, чакаў і плакаў. Цудам выжыў. Забралі. Лячылі.

Сэрца не вытрымала разлукі з роднымі. З тымі, з кім жыў і каго страціў.

Пайшоў на вясёлку. Да сваіх гаспадароў. Сабака не можа жыць без ласкі і любові. Без тых, хто яго прыручыў.

Добрых табе сноў, Крым. Лёгкай дарогі па вясёлцы. І абавязкова знайдзі сваіх гаспадароў. Чуеш? Абавязкова! Яны цябе не кінуць там. Яны таксама ўмеюць любіць і чакаць. Тваё сэрца вяртаецца да іх. Шукай Крым. Шукай!

Усяго табе... на вясёлцы...»