Польшча абмежавала ўезд з поўным бакам

Мытная служба Рэспублікі Польшча ўводзіць новыя правілы ўвозу паліва на тэрыторыю Еўрасаюза, паведамляецца на сайце Брэсцкай мытні.


Па паведамленні польскага боку, з 14 лістапада 2016 года ўзмоцнены кантроль у дачыненні да паліва, што ўвозіцца на тэрыторыю Еўрапейскага саюза ў баках легкавых аўтамабіляў.
Кантроль будзе ажыццяўляцца наступным чынам: уезд у Польшчу транспартных сродкаў з поўнымі бакамі, прадугледжанымі заводам-вытворцам, будзе магчымы бяспошлінна адзін раз у 72 гадзіны (3 сутак). Калі ўезд будзе ажыццяўляцца часцей, то норма бяспошліннага ўвозу не можа перавышаць 20 літраў паліва.Калі ліміт будзе перавышаны, грамадзяніну прыйдзецца заплаціць мытную пошліну, альбо транспартны сродак будзе вернуты на тэрыторыю Беларусі.
Адлік часу (сутак) для кожнага грамадзяніна будзе ажыццяўляцца індывідуальна, пры гэтым суткі будуць лічыцца не каляндарныя, а з моманту папярэдняга ўезду ў Польшчу.
Нагадаем, з 1 верасня былі знятыя абмежаванні на вываз паліва за межы Беларусі. Калі раней на адной і той жа машыне аўтамабілісту з нашай краіны прыходзілася выязджаць за межы ЕАЭС (да 2014 года — Мытнага саюза) часцей, чым раз у 8 дзён, то яму трэба было заплаціць пошліну на паліва (якая залежыла ад ставак экспартных пошлін на нафту і нафтапрадукты, якія пастаянна змяняліся).
У канцы кастрычніка ўрад Польшчы заявіў аб падрыхтоўцы цэлага комплексу мер, накіраваных на скарачэнне паставак нелегальнага паліва ў краіну. Асноўнымі «бензавозамі» чыноўнікі назвалі прыгранічных гандляроў і кіроўцаў фур.
Па падліках Польскай арганізацыі нафтавай прамысловасці і гандлю, чорны рынак бензіну ў Польшчы складае 7-8% ад агульнага, а дызеля — усе 10%. Бюджэт нясе страты ў мільярды злотых (называюцца сумы ад 3,5 да 4 мільярдаў у год). Верагодней за ўсё, бязмытны ўвоз паліва не часцей, чым раз у трое сутак — адна з мер барацьбы з чорным рынкам.
Паводле auto.tut.by