629-ты дзень вайны. «Жэст добрай волі» на Херсоншчыне — што гэта было?

Аналітыкі Інстытута вывучэння вайны (ISW) патлумачылі, для чаго расійцы ўчора загаварылі аб перагрупоўцы ў Херсонскай вобласці. СМІ РФ апублікавалі адпаведнае паведамленне, якое многія ўспрынялі як анансаванае адступленне, але потым інфармацыя была выдаленая.

ISW прыводзіць тры версіі гэтага.

Ваеннае камандаванне РФ магло загадаць дзяржаўным СМІ апублікаваць, а затым адклікаць апавяшчэнне аб перагрупоўцы войскаў на акупаванай тэрыторыі Херсонскай вобласці ў рамках інфармацыйнай аперацыі. Такія дзеянні могуць быць накіраваны на тое, каб прымусіць байцоў УСУ недаацаніць наяўную расійскую жывую сілу на левым беразе Херсонскай вобласці.

У той жа час гэта можа паказваць і на рэальныя дыскусіі, якія адбываюцца ў вышэйшых эшалонах расійскага вайсковага камандавання, якія проста заўчасна выйшлі ў інфармацыйную прастору. Паводле іншай гіпотэзы, вонкавая крыніца пад выглядам Міністэрства абароны РФ перадала прапагандыстам інфармацыю аб «перагрупоўцы» войскаў на левым беразе Херсонскай вобласці.

На думку экспертаў, незалежна ад прычын і абставінаў паведамленняў ТАСС і РІА «Навіны», рэакцыя на іх сведчыць аб тым, што падзеі на Херсоншчыне застаюцца вельмі балючымі ў інфармацыйнай прасторы РФ. У прыватнасці, расійская медыяпрастора да гэтага часу не згуртавалася вакол адзінай рыторыкі аб тым, што адбываецца на ўсходнім беразе Дняпра.

Нагадаем, 13 лістапада шэраг пракрамлёўскіх прапагандысцкіх СМІ са спасылкай на Мінабароны РФ абвясцілі, што акупацыйная армія прыняла рашэнне заняць «больш выгадныя пазіцыі» ў Херсонскай вобласці, аднак праз некалькі хвілін публікацыю выдалілі і назвалі памылкай. Пазней у Мінабароны РФ заявілі, што гэта была правакацыя.

За мінулыя суткі ўкраінскім вайскоўцам удалося адбіць дзясяткі нападаў акупантаў. Самымі гарачымі напрамкамі застаюцца Аўдзееўскі, Бахмуцкі і Мар'інскі.

Як паведамляе Генштаб УСУ, на працягу сутак на фронце адбылося 80 баявых сутыкненняў з ворагам.

Так, на Купянскім кірунку расійцы вялі штурмавыя дзеянні ў раёнах Сінькоўкі, Петрапаўлаўкі, Іванаўкі Харкаўскай вобласці, дзе ўкраінскія воіны адбілі сем нападаў. На Ліманскім кірунку расійцы беспаспяхова спрабавалі штурмаваць украінскія пазіцыі паблізу Надзежды, Новаегараўкі Луганскай вобласці і Торскага Данецкай вобласці. Тут УСУ адбілі шэсць нападаў ворага.

Акрамя таго, на Бахмуцкім кірунку акупанты штурмавалі пазіцыі каля Іваноўскага, Кляшчыеўкі і Андрэеўкі Данецкай вобласці. Там украінскімі абаронцамі было адбіта 15 нападаў. Таксама сілы абароны Украіны працягваюць штурмавыя дзеянні на поўдзень ад Бахмута Данецкай вобласці, дзе наносяць расійцам страты ў жывой сіле і тэхніцы, замацоўваюцца на дасягнутых рубяжах.

На Аўдзееўскім кірунку расійцы пры падтрымцы авіяцыі працягвалі спробы акружыць Аўдзееўку. Украінскія ж воіны стойка трымаюць абарону, наносячы акупантам значныя страты. Беспаспяховымі былі наступальныя дзеянні РФ на поўдзень ад Новакалінавага, Аўдзееўкі, Севернага і на ўсход ад Першамайскага Данецкай вобласці. Тут сіламі абароны Украіны адбіта 18 нападаў.

Паводле звестак Генштаба, на Мар'інскім кірунку расійцы з выкарыстаннем авіяцыі вялі беспаспяховыя штурмы ў раёнах Мар'інкі і Наваміхайлаўкі Данецкай вобласці. У гэтай зоне УСУ адбілі 24 атакі.

Таксама на Шахцёрскім кірунку расійцы вялі беспаспяховыя штурмавыя дзеянні на поўдзень ад Залатой Нівы Данецкай вобласці, а на Запарожскім кірунку ўкраінскія абаронцы адбілі чатыры атакі захопнікаў у раёне населенага пункта Рабоціна Запарожскай вобласці.

У той жа час украінскія войскі працягваюць наступаць на Мелітопальскім кірунку. Там УСУ наносяць акупантам значныя страты ў жывой сіле і тэхніцы, знясільваюць іх уздоўж усёй лініі фронту.

У панядзелак, 13 лістапада, расійскія войскі працягнулі наступ у раёне Аўдзееўкі і дасягнулі пацверджаных поспехаў на ўсходняй ускраіне Стэпавага (3 км на поўнач ад Аўдзееўкі).

Як паведамляе Інстытут вывучэння вайны (ISW), поспех акупантаў на Аўдзееўскім кірунку пацвярджаюць геалакацыйныя звесткі. Генштаб УСУ заяўляў, што расійскія войскі здзейснілі няўдалыя атакі на паўднёвы ўсход і поўдзень ад Новакалінавага (11 км на паўночны захад ад Аўдзееўкі), на ўсход ад Першамайскага (11 км на паўднёвы захад ад Аўдзееўкі) і Навабахмутоўкі (13 км на паўночны ўсход ад Аўдзееўкі), а таксама паблізу Аўдзееўкі і Паўночнага (6 км на захад ад Аўдзееўкі).

Некалькі расійскіх «ваенкараў» сцвярджалі, што працягваюцца баі ля Аўдзееўскага коксахімічнага завода і на поўначы горада. Іншы расійскі вайсковы блогер сцвярджаў, што ўкраінскія войскі кантралююць прынамсі палову завода і што нібыта паведамленні аб захопе завода расійскімі войскамі з'яўляюцца ілжывымі. ISW не пацвярджае, што расійцы завод.

У той жа час расійскія ваенныя блогеры сцвярджалі, што ўкраінскія сілы паспяхова контратакавалі і прасунуліся паблізу Аўдзееўкі 13 лістапада да чыгуначнай станцыі каля Стэпавага і каля рэстарана «Царскае паляванне» на поўдзень ад Аўдзееўкі.

Іншы расійскі ваенны блогер сцвярджаў, што ўкраінскія сілы няўдала атакавалі паблізу Краснагораўкі (5 км на поўнач ад Аўдзееўкі).

У ноч на 14 лістапада невядомы дрон атакаваў стратэгічны важны аб'ект Расіі — хімічны завод у Бранскай вобласці. Пра гэта раніцай заявілі расійскія медыя. Паводле іх звестак, удар прыйшоўся па будаўнічым цэху Бранскага хімічнага завода імя 50-годдзя СССР, які знаходзіцца ў раёне пасёлка Сяльцо.

З прычыны ўдару дах цэха быў прабіты ў трох месцах.

«Быў знойдзены неразарваны беспілотнік самалётнага тыпу з выбуховым рэчывам. Пры гэтым, дах цэха быў прабіты ў трох месцах. На месца былі выкліканыя супрацоўнікі спецслужбаў», — піша Baza.

Адзначаецца, што ў выніку ўдару БПЛА людзі не пацярпелі.